Dagko nga barko pabiyahion sa Olango

CEBU, Philippines — Bukas ra ang Philippine Coast Guard ug Maritime Industry Authority sa hangyo sa lokal nga kagamhanan sa Dakbayan sa Lapu-Lapu nga tugtan ang 250 gross tonnage pataas nga barko nga mobiyahe sa isla sa Olango.

Gikan sa Hilton Port sa Punta Engaño paingon sa Sta. Rosa Wharf sa Olango aduna nay nagbiyahe nga barko apan ubos lang sa 250 gross tonnage mao nga dili makabiyahe kung dili maayo ang panahon.

Ang pangulo sa Lapu-Lapu City Disaster Risk Reduction and Management Office, Nagiel Bañacia, niingon nga ang pagbiyahe sa mas dagku nga barko maoy long-term solution sa gale warning situation ug aron pagseguro nga magpadayon ang biyahe sa mga barko gikan sa Hilton Port paingon sa Sta. Rosa Wharf.

Si Atty. Daniel Oral, legal officer sa MARINA-7, niingon nga nag-imbitar sila sa mga operators nga gustong mo-apply aron pag-augment og serbisyo sa maong rota isip tubag sa hangyo sa kagamhanan sa siyudad.

Si Oral nitug-an nga tinguha nila ang pagwala sa wooden commercial vessels nga naglawig sa lugar sa tuyo nga ilisan og steel-hulled vessels karong tuiga. Samtang si Lt. JG Michael Encina, operations officer, PCG District Central Visayas, niasoy nga kun dunay gale warning sila gyud ang mosuspenso sa biyahe aron pagseguro sa mga pasahero.

Si Encina niasoy nga suportado sab nila ang hangyo sa kagamhanan sa siyudad. (GMR) (BANAT NEWS)