Mayor Chiong gisuspenspo 90 ka adlaw sa Sandiganbayan

CEBU, Philippines — Gipaubos sa 90 ka adlaw nga preventive suspension sa Sandiganbayan ang mayor sa Dakbayan sa Naga.

Kini may kalabutan sa graft case nga giatubang sa Mayor Valdemar Chiong tungod sa pasangil nga niisyu kini og permit sa dili kwalipikado nga kompaniya niadtong 2014.

Gimanduan sa Sandiganbayan ang Department of Interior and Local Government (DILG) nga mopatuman sa suspension order.

Ang korte wala makakita og gibug-aton sa argumento ni Chiong nga dili na kinahanglan nga ipaubos siya sa suspension.

Kini gumikan kay ang prosekusiyon ug depensa nakakuha na og igong ebidensya ug saksi alang sa kaso.

Gipasabot sa mayor nga maong suspension makaaapekto sa paghatag og serbisyo ngadto sa mga residente sa Dakbayan sa Naga ug mo-nullify kini sa kagustohan sa katawhan nga maoy nipili niya pagka-mayor. Apan ang Sandiganbayan Sixth Division nagkanayon nga ang suspension ni Chiong mandato kini ubos Section 13 sa Republic Act 3019 o and Anti-Graft and Corrupt Practices Act.

Ang Ombudsman nikiha kang Chiong human niisyu kini og mayor’s permit pabor sa Petronas Energy Philippines Inc. bisan pa man nga kuwang ang maong kompaniya og Fire Safety Inspection Certificate gikan Bureau of Fire Protection (BFP) nga usa sa requirements sa pagkuhan og mayor’s permit.

Si Chiong nagkanayon nga motuman siya sa kamanduan sa Sandigan.

“We submit to the wisdom of the court,” matud ni Chiong. (GMR) (BANAT NEWS)