Big timer nasakmitan og P8.1 milyones shabu
CEBU, Philippines — Mokabat sa P 8.1 milyones nga balor sa ilegal nga drugas ang nasakmit atol sa buy-bust operation sa Unit 2 Sitio Ophra, Kalunasan, Cebu City niadtong Martes sa hapon.
Ang dinakpan giila nga si Raffy Corbin Abaya alias Raprap, 23, taga San Miguel, Cebu City.
Ang maong operasyon pinangulohan sa Police Drug Enforcement Group 7 ug inabagan sa Philippine Drug Enforcement Agency 7, Cebu City Police Office ug sa mga operatiba sa Police Regional Office-7.
Base sa kapolisan nga positibong napalitan sa poseur buyer ang suspek og usa ka kilo sa gituohang shabu nga gisulod og usa ka plastic, walo ka heat sealed transparent nga plastic nga may sulod nga gituohang shabu nga color light brown.
Ang walo ka pekete motimbang og 200 ka gramo nga balor og P8,160,000.
Matud sa hepe sa PDEG nga si Police Lieutenant Colonel Glenn Mayam nga si Abaya miyembro sa usa ka big time nga illegal drug group nga nag-operate sa tibuok Dakbayan sa Sugbo ingon man sa Probinsiya sa Sugbo.
Giimbestigar sab kun kinsa ang mga kakunsabo ni Abaya sa maong ilegal nga negosyo.
Ang suspek gitanggong sa prisohan sa Guadalupe Police Station sa CCPO samtang pasakaan og kasong pagpamaligya ug paghupot og ilegal nga drugas. Jenny Luz R. Tejas, CNU Intern/GMR) (BANAT NEWS)
- Latest
