Barangay Caohagan giingong ideklara nga drug-free
CEBU, Philippines — Ang Barangay Caohagan sa Isla sa Olango, Dakbayan sa Lapu-Lapu giingong labing unang barangay sa isla nga mahimong drug free.
Kini subay sa gihimong proseso sa kapolisan sa siyudad, Philippine Drug Enforcement Agency (PDEA)-7, Department of Interior and Local Government (DILG) ug Barangay Anti-Drug Abuse Council (BADAC).
Si Mayor Junard Ahong Chan kauban sa opisyales sa Lapu-Lapu City Police Office (LLCPO), PDEA-7 ug DILG ang nibisita sa Barangay Caohagan isip kabahin sa pagahimuon nga pagpangandam alang sa hingpit nga deklarasyon isip drug free nga barangay sa Isla sa Olango.
Si Garry Lao, executive director sa City of Lapu-Lapu Office for Substance Abuse Prevention (CLOSAP) nagkanayon nga ilang giplano ang pagsumiter sa mga gikihanglan nga dokumento alang sa pagdeklara nga drug clearing sa mga sakop sa regional oversight committee karong umaabot buwan sa Septiyembre niining tuiga.
Ang oversight committee mohimo og review ug mao usab ang mo aprobar sa mga dokumento nga gisumiter alang sa hingpit nga pag-ila nga nalimpiyo na sa ilegal nga drugas ang barangay.
Matud ni Lao nga naglakip sa mga gikinahanglan nga rekesitos mao ang mga taho nga madawat nga walay nagpuyo nga nalambit sa ilegal nga drugas ug ingon man ang pagpalihok og balik sa anti-drug abuse council niini.Si Caohagan Barangay Captain Ranilo Abayan nagkanayon nga naningkamot sila ug nagtinabangay usab ang mga molupyo nga dili masudlan ang ilang dapit sa ilegal nga drugas.
“Ang amo diri, katulo sa usa ka seman mag-conduct mi og house-to-house visit sa among mga kaisigbarangay. Makig-estorya pod mi sa mga estudyante labot sa epekto ug paglikay sa drugas”, dugang ni Abayan. (BDB) (BANAT NEWS)
- Latest
