Mga establisamento ug real estate susihon sa Cebu City
CEBU, Philippines — Si Cebu City Mayor Edgardo Labella niisyu kini og executive order nga nimugna sa task force nga maoy tahasan sa pag-profile, pagsusi ug pag-mapping sa tanang unit sa real estate ug mga business establishment sa siyudad aron pahugtan ang pagkolekta sa mga buhis.
Usa sa mga gimbuhaton sa task force mao ang pagsusi sa mga tag-iya sa kabtangan ug pag-verify sa impormasyon sa kantidad sa ilang mga kabtangan nga ilang gipadayag.
"I’m very positive that if we can properly map and profile these properties, we can increase our taxable real property tax rate base without necessarily increasing the tax rates”, matud ni Labella.
Sa tuig 2018, ang Cebu City Treasurer’s Office nakolekta kini og P1.4 bilyon nga buhis diin sobra kini sa target niini nga P1 bilyon alang sa buhis sa real estate. Karong tuiga, target sa siyudad ang pagkolekta og P1.1 bilyon gikan sa RPT. Lakip sa molangkub sa task force mao ang City Treasurer, City Assessor, Building Official ug City Attorney.
Gipasabot ni Labella nga buot niya nga masiguro nga ang tanang negosyo ug tag-iya sa kabtangan nagbayad sa ilang mga buhis sa siyudad.
Base sa EO, ang task force mosusi sa sestema aron mahibaw-an ang mga gap ug problema sa records. Matud ni Labella nga ang task force kinahanglang mosumetir og regular report sa iyang opisina kalabot sa resulta sa ilang inspection.
Ang pag-umol sa task force subay sa Joint Memorandum Circular No. 01 o ang “Revised Standards in Processing Business Permits and Licensing in all Cities and Municipalities.” (/BDB)(BANATNEWS)
- Latest
