4 balay nasunog sa Hipodromo, duha sa Marigondon

CEBU, Philippines – Niulbo ang sunog sa Kennedy Street, Sitio Holy Trinity, Hipodromo, Dakbayan sa Sugbo kagahapon diin upat ka balay ang naugdaw.

Gibana-bana nga P70 mil ang danyos sa maong sunog diin sa inisyal nga imbestigasyon sa Cebu City Fire Department nga ang kayo nagsugod sa balay sa giila nga si Antonio Empleo.

Wala pa matumbok kun unsa ang hinungdan sa maong sunog.

Samtang laing sunog niulbo sa may Villa Verna, Marigondon, Dakbayan sa Lapu-Lapu kagahapon sa buntag diin nabiyaan nga katol ang gituohan nga hinungdan.

Usa ka panimalay ang hingpit nga naugdaw ug usa usab ang partial nga nakan-an sa kayo.

Ang sunog nagsugod sa panimalay ni Ernesto Ubay nga ginama sa light materials ug gibana-bana nga moabot sa P45 mil ang danyos. (Camille L. Pateres ug Rowena D. Capistrano/GMR)

7 patay sa trahedya sa Guimaras nia na sa Sugbo

Duha sa siyam nga nakalas sa pagkalunod sa bangka sa kadagatan sa Guimaras nga taga Ermita, Dakbayan sa Sugbo ang adto lang sa Iloilo ilubong.

Pito kanila ang gidala na sa Dakbayan sa Sugbo aron hayaon una sa Ermita Gym sulod sa pipila ka adlaw dayun ilubong sa Domingo.

Matud ni Barangay Kapitan Mark Rizaldy Miral nga si Romeo Baguio Jr. ug anak niini nga si Jay Arvien Baguio ang gipabilin ni Maria Nievez Grandeza, ang bugtong nakaluwas gikan sa Ermita, tungod sa kagustohan niining usahon lang sa paglubong ang iyang pamanhonon ug ang anak didto sa Guimaras.

Nadala pagbalik sa Sugbo sakay sa C130 mao sila si Bernardo Janson, Jared Janson, Romeo Baguio Sr., Angelina Baguio, Romnel Baguio, Danilyn Baguio, ug Danielle Baguio. Tuyo nga niadto sa Iloilo si Miral ug anak ni Bernardo nga si Janber Janson aron makigkita ni Presidente Rodrigo Duterte sa mga pamilya sa namatay.

Gitug-an ni Miral nga ang Presidente nipasalig nga tanang ayuda nga pwedeng mahatag ihatag hinungdan nga makig-alayon lang gihapon siya kanunay ni Mayor Edgardo Labella ug sa Office of the Presidential Assistance for the Visayas.

Matag pamilya nakadawat og hinabang gikan sa Presidente apan wala siya nasayud kung pila. (/GMR)(BANAT NEWS)