Lawas sa mga Sugboanong naapil sa lunod dad-on dinhi

CEBU, Philippines – Kapitan Mark Rizaldy Miral sa Barangay Ermita sa Dakbayan sa Sugbo, nilupad karon padulong sa Iloilo kuyog ang ikaduha nga anak ni Bernardo Janson nga si Janber aron makigkita ni Presidente Rodrigo Duterte. Si Duterte gikatakdang mobisita sa lugar aron makigkita sa mga pamilya nga nawagtangan ug kabanay atol sa pagkalunod sa tulo ka mga de pasaheroang bangka sa Guimaras Strait.

Matud pa ni Miral sa pakighinabi sa Banat News gitawagan sila sa Office of the President nga kinahanglan silang moadto sa Iloilo aron makigkita sa pangulo.

Sumala pa ni Miral usa sa ilang tuyo didto mao ang pagdala og balik sa lawas ni Bernardo ug ang kwatro anyos nga anak niini nga si Jarred nga nakalas sab sa maong trahedya aron sa Ermita sila hayaon.

Mapasalamaton ang pamilyang Janson sa mga nipadangat sa ilang pahasubo ug malaumon sila nga ilakip usab sa pag-ampo ang tanan nga nakalas gawas sa mga Janson anaa usab ang pamilyang Baguio nga sila si Romeo Baguio Sr., Angelina Baguio, Romeo Baguio Jr., Danilyn Baguio, ug Jay Arvien Baguio, lakip usab ang gipangita pang sila si Romnel Baguio ug Danielle Baguio. (/IBM)(BANAT NEWS)