Lahugay sa kaparian gipatuman sa Archdiocese of Cebu

CEBU, Philippines – Padayun nga nagbangutan ang banay nga Janson human sa pagtaliwan sa ilang padre de pamilya nga si Bernardo Janson uban sa kamanghuran nga anak niini nga si Jared. Ang duha biktima sa pagkalunod bangka didto sa Guimaras sa Ilo-ilo.

Si Jason, ang 26-anyos nga anak ni Bernard, miingon nga grabeng sakit ilang gibati sa pagkakalas sa ilang amahan ug igsuon, apan gihinay-hinay nila kini og dawat tungod kay usa kini ka disgrasya ug wala silay angay basulon niini.

Tinguha nalang ni Jason nga mauli sa dinalian nga panahon ang iyang amahan ug manghud aron mahatagan kini nila ug desente nga lubong ug mapahimutang kini nila ug tarong.

Gitug-an ni Jason, kay wala naman ang ilang padre de pamilya nga maoy nagbuhi kanila hinungdan nagkasinabot nalang silang managsuon nga magtinabangay nalang sa ilang pamilya.

Si Jason nitug-an bisan ug aduna na siyay kabilinggan sa kinabuhi kay aduna na man siyay kaugalingon nga pamilya andam gihapon siya mohatag ug ayuda sa iyang pamilya ilabi na wala na ang ilang amahan.

Gihulagway ni Jason ang iyang amahan nga usa ka maayong tawo ug kugihan kaayo para sa pagbuhi sa ilang pamilya.

Bisan sa dakong trahedya nga niigo sa ilang pamilya si Jason nitug-an andam ra gihapon silang modawat niini kay pagbuot man kini tanan sa kahitas-an, kay ang Ginoo dili mohatag ug pagsuway sa tawo kung dili niini kaya.

Gipaabot karon sa pamilya Janson ang pag-abot sa nitaliwan nilang amahan ug igsuon diin tinguha nilang hayaon kini sulod sa Gym sa Ermita sulod sa pipila ka adlaw. —/LPM (BANAT NEWS)