Duha nadakpan sa buybust

CEBU, Philippines – Duha ka mga  gidudahang tigpayuhot og illegal nga drugas nadakpan ug nasakmitan og P306 mil nga balor sa gituohang drugas sa hiniusang operasyon sa mga tinugyanan sa Police Drug Enforcement Group Visayas ug Parian Police Station sa Sitio Laguna, Barangay Lorega-San Miguel ning Dakbayan sa Sugbo.

Ang mga nasikop naila nga sila si Rodeliza Mabaga, 35anyos, target sa maong operasyon ug Maricel Dalugdug, 36, labandera ug higala ni Mabaga.

Nangulo sa maong operasyon si Police Lt. Col Glenn Mayam, hepe sa PDEG Visayas uban sa mga taga Parian Police Station.

Nasakmit gikan sa mga dinakpan ang 45 gramos sa gituohan shabu.

Sumala pa nga kanunay mogawas ang pangalan ni Mabaga matag dunay madakpang durugista ug kini gitumbok nga tigsuplay sa ilang shabu. Tungod sa mang mga impormasyon, gipanid-an dayon si Mabaga hangtud nga nakompirmar ang report.

Dako ang pagduda sa kapolisan nga sakop og dakong sindikato sa illegal nga drugas ang suspek.

Ang mga dinakpan nagtingkagol na karon  ug pasakaan og kaso karong adlawa.

Samtang sa dakbayan sa Lapu-Lapu, unom ka tawo ang nasikop sa managlahing anti-illegal drugs operation sa  miaging  gabii.

Si Police Major Jaime  Tolentino sa City  Intelligence Branch (CIB)  ug City  Drug Enforcement  Unit  (CDEU)  sa  LLLCPO miila sa ilang dinakpan nga mao sila si  Niño Gomez, 22, taga Barangay Cabancalan,  Dakbayan sa Mandaue ug kauban niini nga babaye nga si  Rizalyn Plaza, 21, taga Soong 1,  Barangay  Mactan sa maong dakbayan.

Laing nadakpan mao sila si Miguel Neis, 24,  anyos nga taga Dakbayan  sa Mandaue ug Patrick  Rubio, 25, Cliford  Osorio, 35, pulos taga dalan Cabantan  sa Dakbayan sa Sugbo.

Matud pa ni  Tolentino nga gihimo ang buy bust  operation base sa reklamo sa mga residente sa lugar batok sa mga suspek.

Gibanabanang mokabat P100 mil nga kantidad sa shabu ang nasakmit gikan sa mga suspetsado.

Kaso nga kalapasan sa Republic Act   9165   o Comprehensive   Dangerous  Drug Act of 2002  ang ilang gipasaka  batok sa maong mga dinakpan  nga  mga pusher og  shabu sa maong lugar. (Romeo  T. Limpangog/IBM)(BANAT NEWS)