Duha ka senior citizens gipamatay

CEBU, Philippines — Duha ka mga senior citizens dinhi sa Dakbayan sa Sugbo ang gipamusil patay sa managlahing hitabo kagahapon sa hapon ug sayo sa kaadlawon.

Gipusil patay ang 60 anyos nga si Marlina Balacy Cabellon samtang kini natulog sa usa ka e-bike diha sa Barangay Duljo-Fatima, Dakbayan sa Sugbo kagahapon sa hapon. Ang biktima lumad nga taga Lazi, Siquijor apan diha na nagpuyo sa Barangay Cogon-Pardo ning dakbayan.

Matud pa ni Police Corporal Emalyn Labating, desk officer sa Mambaling Police Station samtang nagpahuway sa e-bike ang biktima dunay usa ka wala mailhing lalaki ang niduol ug gipusil sa ang ginang nga nakaingon sa iyang kamatayon.

Niining pagsuwat, kasamtangan pa nga giimbestigahan sa kapolisan ang posibleng motibo sa maong krimen.

Samtang kagahapon sa kaadlawon, patay sab ang usa ka 71-anyos nga gituohan kanhi sakop sa Philippine Constabulary human gipusil sa wala mailhing mamumuno sa  Almacin, A. Lopez Street, Barangay Calamba, Dakbayan sa Sugbo  kagahapo sa kaadlawon.

Ang biktima naila nga si Jenito Menguito, taga Andres Abellana, Barangay Guadalupe ning dakbayan. Sumala pa nga nibisita kini sa iyang higala nga nagpuyo sa maong lugar.

Matud pa ni Konsehal Winston Mercado sa maong barangay padulong na uli ang biktima sa dihang gipusil kini sa giingong nagpaabot nga mamumuno nga  nagsakay og motor.

Dugang pa ni Mercado, nakadungog ang higala sa namatay og buto hinungdan iyaha kining gisusi ug didto nakita niini nga iyaha diay amigo.

Ang biktima magsuroyan sa maong lugar kay aduna kini higala.

Nakaangkon og samad sa iyang kalawasan ang biktima gamit ang wala matino nga armas de fuego nga maoy hinungdan sa kamatayon niini.

Blangko pa ang kapulisan sa motibo sa pagpatay kang Menguito ug ila pa kini ipaubos sa imbestigasyon matud pa ni Police Staff Sergeant Alvin Sisles, Desk Officer sa Sawang Calero Police Station. (BANAT NEWS)