P5 milyong shabu, 30 nadakpan

CEBU, Philippines — Dulan sa P5 milyones nga balor sa illegal nga drugas ang nasakmit sa gipahigayon nga buy bust operations ug checkpoints sa managlahi nga lugar sa Metro Cebu Huwebes sa gabii.

Nasikop sa may ML. Quezon Blvd., Barangay Ermita sa Dakbayan sa Sugbo si Giovannie Mancao, alyas Dodong, 18, taga Sitio Buli, Barangay Duljo Fatima,

Nangulo sa maong operation mao si Police Captain Alvin Llamedo uban sa mga ginsakopan niini batok ni Mancao nga gikonsiderar nga high value target tungod kay dinagko ang transaksyon niini sa illegal nga drugas.

Nasakmit gikan kang Mancao ang mga pinutos sa gituohang ginadili nga drugas nga gisulod sa usa ka handy bag nga  motimbang og 500 gramos nga mobalor og P3,440,000.00 base sa Dangerous Drug Board Value, buy bust money ug cellphone nga keypad.

Laing operation nga gipahigayon sa Carbon Police nahitabo sa may Climaco Barangay Pahina Central nga gikasikop ni Sanny Bermudez, 21, taga Jones Avenue, Barangay Santa Cruz kinsa nakuhaan og 140 gramos nga gidudahang shabu nga mobalor og P950 mil, buy bust money ug calculator.

Samtang sa dakbayan sa Mandaue walo ka mga tawo ang nasikop atol sa police checkpoint nga gipahigayon sa Police Station 1 sa may A. Soriano Street, Barangay Centro tungod sa pagdala og ginadili nga drugas.

Ang mga nasikop mao sila si Allan Sadio, 47, Jessie James Jurigue, 28, Lapu-lapu City; Norman Laurente, 40, Jerrymae Argawanon, 19, Fil Anthony Cabansag, 24, Jovani Pagligaran, 33, Moises Agbay Jr, ug Abel Opiasa, 29.

Nasakmit gikan kanila ang mga kagamitan sa pagsuyop og shabu, drugas nga motimbang sa kinatibuk-an og 11 gramos nga mobalor og P55 mil ug duha ka motor.

Samtang managkapuyo nga giingong nag-operate og drug den ingon man unom ka gipasanginlang manuyopay ang nadakpan atol sa buy bust operation nga gihimo sa taga Provincial Intelligence Branch (PIB) sa Cebu Provincial Police Office (CPPO) sa Sitio Mananga 1, Barangay Tabunok Dakbayan sa Talisay kagahapon sa 1:27 sa kaadlawon.

Ang managkapuyo mao sila si Roberto Abasolo ug si Nina Pautan nga maoy target sa kapolisan tungod sa pag-operate og suyopanan sa maong dapit.

Si Police Lt. Col. Marlu Conag, hepe sa PIB maoy nangulo sa operasyon ug naatlan nga daghan ang bisita sa duha lakip ang duha ka menor de edad.

Ang mga dinakpan mao sila si Eric Taub, Mitchel May Marcelo, Jomar Pautan, Brix Iballar, Lloyd Echavez, Jasan Suarez ug ang duha ka menor de edad nga pulos lalaki.

Nakuha sa mga dinakpan ang 27 ka sachet sa gituohang shabu nga mitimbang og 16 gramos nga adunay bana-bana nga kantidad nga P108,800 ug drug paraphernalia, cellphone, cash ug buy bust money.

Sa laing bahin, unom sab ka gidudahang tigpayuhot og illegal nga drugas ang nadakpan sa mga sakop sa City Intelligence  Branch (CIB) ug  City Drug Enforcement Unit (CDEU) sa Lapu-Lapu City Police Office (LLCPO).

Nadakpan sa grupo ni Police Major Jaime Tolentino sa CIB diha sa Sitio Matumbo sa Barangay Pusok sila si  Niño Eduardo De Leon Gomez, 22 ug kauban niining babaye nga si Rizalyn Soliva Plaza, 21.

Ang duha  nakuhaan og 12 ka gagmay nga paketeng shabu, P200  nga buy bust money ug ingon man P2,000.

Sa laing operasyon sa CIB diha sa Sitio Mustang sa mao gihapong barangay  nadakpan sila si Miguel Jucom Neis, 24, ug si Patrick Cabahug Rubio,25, ug nakuhaan sab og 11  ka paketeng gidudahang shabu, buy bust money ug salapi nga gituohang halin niini.

Samtang sa Sitio Sta. Maria nadakpan sab sila si Virgilo Tipon Tipon Julio, 34 , ug si Cliford Timaan Osorio,35, nga nakuhaan sab og 12  ka paketeng shabu, buy bust money ug salapi nga gituohang sa shabu.

Ang mga dinakpan gikatakdang kasohan og paglapas sa Sec. 11 ug Sec. 12 Act.2 of R.A 9165. (Gabriel Bonjoc, Romeo Limpangog,  ug mga reports nila ni Lowena A. Valmoria, Jenny Luz R. Tejas  ug Noreen Rose C. Vilchez/IBM)(BANATNEWS)