Davide ‘nagpaabang’ sa ubos nga presyo

CEBU, Philippines — Giandam karon sa buhatan sa gobernador ang pagpasaka og mga kaso batok kang Bise Gobernador Hilario Davide III gumikan sa anomaliya tali sa Innoland Development Corporation.

Mihimo og pag-audit ang buhatan ni Gobernador Gwendolyn Garcia sa tanang mga transaksyon  sa Lalawigan sa Sugbo sa miaging administrasyon ug nasayran nga ang probinsya wala moagi sa proseso sa pagsulod og kontrata sa pagpaabang og luna sa Innoland. “Nahibal-an namon nga sa panahon sa Abril 2014, ang Probinsya sa Sugbo, pinaagi ni Gobernador Davide nagpatuman sa usa ka kontrata sa pag-abang pabor sa Innoland Development Corporation nga naglambigit sa usa ka bahin sa yuta nga nag-atubang sa IT Park,” matud pa ni Atty. Mariano Martinquilla, ang Cebu Provincial Legal Management Consultant.

Ang unom ka tuig nga kontrata sa pag-abang sa Innoland alang sa 849 square meters sa Lot No. 929-B nga nahimutang sa dalan Jose Maria del Mar gipirmahan niadtong Abril 2014 ug gikatakdang matapos sa Abril 2020, nagkantidad og P50 matag square meter o P42,450 matag bulan.

“Kini ingon nga ubos kaayo ang presyo ... kung kita motan-aw sa mga dokumento, wala kaagi og proseso…  Walay bidding,” dugang ni Martinquilla.

Nunot niini, ang gobernador mipadala og sulat kang Charles Vincent Ong, ang opisyal sa Innoland. Unod sa maong sulat mao ang pagterminate sa kontrata.

Apan ang tubag sa opisyal sa Innoland, miingon kini nga wala sila masayod sa anomaliya. Laing sulat ang gipadala ngadto sa Innoland niadtong Hulyo 29 pinaagi ni Povincial Legal Officer Donato Villa ug giingnan nga mobiya na sa giabangang lote sulod sa pito ka adlaw gikan sa pagdawat sa sulat.Subay niini, gibutyag ni Martinquilla nga ila karong giproseso ang pagpasaka og mga reklamong kriminal ug administratibo batok kang Davide ngadto sa buhatan sa Ombudsman-Visayas. (Beverly I. Manla, CNU Intern/DILT) (BANAT NEWS)