Duha gipamusil patay

CEBU, Philippines – Patay  ang usa ka drayber sa traysikol nga gipusil  sa riding in tandem sa  Sitio  Bagong  Bayan, Barangay  Maribago  sa Dakbayan sa Lapu-Lapu sa miaging Lunes sa gabii.

Si  Police Staff Master Sergeant Raymond Sosmeña sa Presinto 4 miila  sa biktima nga si Edwin Melicor, 50, nagpuyo sa Sitio Pagutlan sa Barangay Maribago.

Matud pa ni Sosmeña nagpaabot og pasahero ang biktima sa dihang gihunongan og riding in tandem ug gipauwanan siya og bala ug pagkahuman daling misutoy palayo ang mga mamumuno.

Siyam ka basiyo sa bala sa .9mm ang nakuha sa crime scene. Matud ni Sosmeña nadakpan na kaniadto sa kaso sa illegal nga drugas ang biktima ug mao kini ang ilang gitan-aw nga posibleng motibo.

Samtang patay sab ang usa ka 29-anyos nga lalaki human kini gipusil sa ilang silingan sa may Sitio Poo, Barangay Balud, Lungsod sa Dalaguete.

Ang nakalas nila nga si Danilo Batoctoy, dunay kapuyo ug residente sa maong lugar. Samtang ang suspetsado mao si Saulo Debuayan, 56.

Matud pa ni Police Master Sergeant Arnold Frinal, Desk Officer sa Dalaguete Police Station nagpalit og posporo ang biktima sa dihang giduol kini ug diretsong gipusil sa suspek sa makadaghan higayon hinungdan sa iyang kamatayon.

Nadakpan dayon sa follow-up operation ang mamumuno apan wala pa kini motug-an kun unsa iyang motibo paghimo sa krimen. (Rowena Capistrano/IBM)(BANAT NEWS)