5 ra ang ‘gipatay’ sa NPA

CEBU, Philippines — Lima lamang sa 16 ka mga tawo sa Negros Oriental ang napamatud-ang gipatay sa mga sakop sa NPA matud pa ni Police Regional Office-7 Director, Police Brigadier General Debold Sinas human sa ilang command conference uban ang mga hepe sa Lalawigan sa Negros Oriental ug Police Station Heads niadtong Biyernes.

Bisan pa sa mga huhungihong nga nagpalibot sa rehiyon nga ang mga pagpatay gihimo sa NPA, ang mga polis mipresenta sa nagkalainlain nga motibo luyo sa mga nahitabong pagpatay.

Nasayran nga tulo ka mga insidente sa pagpamusil nga adunay lima ka mga biktima ang gipamatud-an nga gihimo sa NPA. Kini ang kaso nila ni Weny Alegre ug Felimon Janayan nga gipusil sa Zamboaguita niadtong Hulyo 24, Buenavista Barangay Captain Romeo Alipan nga gipusil niadtong Hulyo 25 sa Guihulngan City ug ang kaso ni Marlon Ocampo ug ang usa ka tuig nga anak niini nga si Marjun nga gipusil patay sa samang adlaw. Nanghinaut si Sinas nga ang katawhan dili unta mohatag og bisan unsa nga konklusyon kay nagpadayon ang kapolisan sa pagsuhid sa uban pang mga kaso subay sa ilang nakuha nga mga ebidensya.

Ang ubang mga kaso sa pagpatay gituohan nga tungod sa panagbangi sa yuta, ilabi na ang mga kaso sa Bayawa Siblings nga gipusil niadtong Hulyo 25 ug si Attorney Anthony Trinidad nga gipusil niadtong Hulyo 23 nga giingong maoy nagdumala sa kaso sa magsuon.

Apan, ang laing motibo sa imbestigasyon sa kapolisan mao ang sayop nga pagdumala sa eskwelahan nga gidumala sa principal nga si Bayawa.

Ang laing motibo nga gitan-aw karon sa mga polis mao ang politikal ug negosyong anggulo nga naglambigit sa pagpatay sa mga opisyal sa gobyerno.

Gawas pa, ang kapolisan mikumpirma nga adunay lista sa mga tawo nga posibleng nagpaluyo sa mga pagpatay apan dili una nila kini ipahibawo hangtud nga di mahuman ang ilang gihimong pagsusi.

Hinuon, si Sinas miingon nga ang Negros Oriental dili ‘full alert’ apan anaa sa ‘hightened alert’ nga nagtumong sa pagpakusog sa patrolya sa mga dapit nga nalambigit sa pagpatay.

Mahitungod sa pangagpas sa posibleng pagdeklarar sa Martial Law sa Negros, kini miingon nga dili ang kapolisan maoy makabuot niini.

Samtang laing pagpamusil ang nahitabo kagahapon sa maong lalawigan nga nahitabo sa Brgy. Bukalan, Canlaon City nga mao na ang ika-17 sa listahan.

Ang biktima giila nga si nga Anaciansano Rosalita nga gipusil sa wala pa mailhing mamumuno. (/DILT)(BANATNEWS)