7 ka CT-TODA nga ‘adik’ gihulipan og mga babaye
CEBU, Philippines — Mga babaye nga sakop sa City of Talisay-Traffic Operation Development Authority (CT-TODA) maoy nihulip sa pito ka mga lalaking gipangtaktak human masayri nga sila tiggamitan og ilegal nga drugas.
Si Jonathan “Joy” Tumulak, ang traffic czar sa dakbayan niingon nga iyang gipagawas sa kadalanan ang mga babaye nga sakop sa CT-TODA aron sa pagpadayon sa trabaho sa pito nga gitaktak.
Gikan sa alas 9 sa buntag hangtud sa alas 11 niadtong Sabado, naka-isyu og 24 ka citation ticket ug naka-impound og upat ka motorsiklo ang unom ka babaye nga enforcers.
Matud pa ni Tumulak nga ang ilang gibuhat usa usab kini sa pagpakita sa katawhan nga adunay gender equality diin ang mahimo sa mga lalaki mahimo sab sa mga babaye.
Naobserbahan niya nga lahi ang reaksyon sa kadaghanan sa mga motorista kon babaye ang mosita.
Gani mas dugay sab moinit ang ulo sa mga babaye nga enforcer ug makapasabot pa sila og tarong sa ngadto sa ilang gipangsita.
Gumikan niini gamiton na gyud ang mga babaye nga enforcer diha sa kadalanan bisan paman kon sila madungagan na og pwersa. Diin ipang-deploy sila panahon sa peak hours. (/DILT)(BANATNEWS)
- Latest