P4.5-M shabu nasakmit

CEBU, Philippines — Mokabat sa P4.5 milyones nga balor sa drugas ang nasakmit atol sa hiniusang buy-bust operation sa mga tinugyanan sa San Nicolas Police Station ug Labangon Police Station gikan sa duha ka dinakpan sa Barangay Buhisan, Dakbayan sa Sugbo kagahapon sa kaadlawon.

Nangulo sa maong operasyon si Police Major Keneth Paul Albotra sa San Nicolas Police Station kauban ang mga sakop sa Labangon Police Station ug pagpakig-alayon sa Philippine Drug Enforcement Agency 7.

Ang nasikop mao sila si Bernadine Regner, 53, kinsa nalakip sa high-value target, ug Ricky Patoc, 51, pulos duhay kapuyo ug taga Sitio Kwako Compound sa maong barangay.

Nasakmit gikan sa mga dinakpan ang pinutos sa gituohang shabu nga motimbang og 655 gramos nga mobalor og P4.5 milyones.

Ang mga dinakpan nagtingkagol na sa selda sa kapolisan samtang gipaabot ang pagsang-at sa tukmang kaso. Tak-om ang mga dinakpan sa dihang gikuhaan og pamahayag.

Sa Salvador St., Sitio Pablo, Barangay Labangon nadakpan usab ang 32-anyos nga si Mary Ann Carteciano kinsa apil sa watchlist sa kapolisan ug ang 42-anyos nga si Allen Labaja.

Nasakmit gikan kanila ang 24 ka pakete sa gituohang shabu nga adunay kantidad nga P47, 600.

Samtang ang bag-ong nilingkod nga Cebu City Police Office director, Police Colonel Gemma Vinluan, niawhag sa mga nalambigit sa ilegal nga drugas nga sa higayon nga madakpan sila dili nalang sila mosukol ug motahan nalang sa ilang kaugalingon ug atubangon ang mga sala nga ilang nahimo. (Noreen Rose C. Vilchez ug Jenny Luz R. Tejas/GMR)(BANATNEWS)