Shootout sa buybust, 3 patay

CEBU, Philippines – Tulo ang patay sa buy-bust operation human niresulta sa pinusilay ang transaksyon tali sa mga gituohang sakop sa sindikato sa illegal nga drugas ug kapolisan diha sa awaaw nga bahin sa Zuellig Street, Barangay Subangdako, Dakbayan sa Mandaue kagahapon sa hapon.

Nakuha sa kapolisan ang gibanabanang onse ka kilong gidudahang shabu nga nagkantidad og P74 milyones.

Ang nakalas sa maong operasyon mao ang subject sa operasyon nga si Prudelgem Mapalo, ug duha ka mga kauban niining mga lalaki nga padayon pang giila sa kapolisan. Ang mga tinugyanan sa City Intelligence Branch  sa Mandaue City Police Office nga gipangulohan ni Police Lieutenant Colonel Bernouli Abalos maoy nihimo og operasyon batok sa mga suspek. Apan inay nga magpadakop giingong nakigpinusilay hinuon ang mga suspek nga niresulta sa ilang kamatayon. Walay nasamdan sa habig sa kapolisan.

Nasakmit gikan sa mga nakalas ang dagkong putos sa ginadili nga drugas, usa ka .357 revolver, .45 caliber pistol ug KG9 submachine pistol ug ang multicab nga giingong gigamit sa mga nakalas sa pakig-transaksyon sa kapolisan. Si Police Major Mercy Villaro, tigpamaba sa Mandaue City Police Office miingon padayon ang gihimo nilang imbestigasyon sa maong operasyon ilabi na sa uban pang mga kaubanan sa mga suspek. Atol ning pagsuwat sa balita, padayon ang pakisusi ang Scene of the Crime Operations  uban sa usa ka prosekyutor sa Mandaue Prosecutors Office. (/IBM)(BANAT NEWS)