Enforcer sa Talisay positibo sa drug test

CEBU, Philippines – Pipila ka sakop sa City of Talisay-Traffic Operation Development Authority (CT-TODA) ang nagpositibo sa ginadiling drugas human sa surprise drug test niadtong Lunes.

Si Jonathan Tumulak kinsa maoy traffic czar sa dakbayan maoy nag-una sa paghatag sa iyang ihi ngadto sa mga sakop sa City Health Office (CHO) aron masusi.

Siya nagkanayon nga pagpakita kini nga ang mga enforcers nga mosita sa mga badlungong motorista sa kadalanan limpyo sa ginadiling drugas.

Asoy pa ni Tumulak nga base sa iyang nasinati sa lain-laing buhatan ug pagkupot og mga sakop aduna gyu’y magpositibo sa ilegal nga drugas.

Iyang gitug-an nga sa inisyal niya nga pakighinabi sa taga CHO adunay iyang sakop nga nagpositibo apan dili pa lang una makatug-an kun pila sila kabuok.

Hinoon aduna siyay upat ka sakop nga gipa-report sulod sa 24-oras human napakyas sa pag-apil sa surprise drug test nga gipahigayon.

Apan ang duha nga wala nakatunga pulos diay masakiton. Ang CT-TODA adunay kinatibuk-ang pwersa nga moabot sa 132 ka sakop. (/GMR)(BANAT NEWS)