Davide: Daghan nisalig ni Duterte
CEBU, Philippines — Nagtuo si Bise Gobernador Hilario Davide III nga ang padayong pagtaas sa rating ni Presidente Rodrigo Duterte nagpasabot nga daghan sa mga Pilipino ang nisalig kaniya human sa niaging tulo ka tuig niini sa gahum.
“Popularity meaning epektibo ang iyang mga policies and programs as President kay otherwise kung dili epektibo, ang iyang popularity rating would go down,” matud ni Davide.
Si Duterte nipahigayon kagahapon sa iyang ika-upat nga State of the Nation Address (SONA) apan uwahi kaayong naabot sa Batasan Complex diin gipahigayon ang dungan nga sesyon sa Kongreso ug Senado.
Kini ang ikatulong higayon nga uwahi nga nahiabot so Duterte sa iyang pagpadangat sa SONA.
Sa unang SONA sa 2016, si Duterte mas sayo og 30-minutos nga naabot diin usa ka oras ug 22 minutos ang iyang pakigpulong.
Sa 2017 nauwahi na siya og 20 minutos diin nihatag siya sa labing taas nga SONA nga niabot og duha ka oras samtang sa 2018 niabot siya alas 3:56 sa hapon apan nagsugod ang iyang SONA alas 5:20 na sa hapon tungod sa gubot sa House leadership. (BANAT NEWS)
- Latest