2 drayber, tag-iya’g salon gipamusil

CEBU, Philippines — Duha ka mga drayber sa traysikol drayber ang nangamatay human sila parehong gipamusil sa riding in tandem sa buwag nga hitabo diha sa lungsod sa Cordova ug sa Dakbayan sa Lapu-Lapu kagahapong adlawa.

Sa Sitio Kasadya,  Barangay Poblacion,   Lungsod  sa Cordova  alas 10  pasado   ang takna  kagahapon sa buntag gipusil patay ang usa ka Rico Amodia, 39, taga Barangay Suba-Basbas sa Dakbayan sa Lapu-Lapuu.

Si Police Captain Efren Diaz Jr., hepe sa  Cordova Police Station miingon nga nagbarog ang biktima samtang nagpaabot og pasahero sa dihang kini gihunongan og motorsiklo ug usa ka wala mailhing lalaki ang nanaog ug diretsong gipusil ang biktima.

Naigo si Amodia sa bukobuko ug hawak hinungdan sa pagkahagba niini sa karsada ug nakabsan dayon sa kinabuhi.

Dali sab misibat ang mamumuno luwan sa Honda XRM nga motorsiklo padung sa direksyon sa Marigondon sa Dakbayan sa Lapu-Lapu.

Sa miaging gabii, laing  drayber sa traysikol ang gipusil sab diha sa  Dakbayan   sa Lapu-Lapu  ug giilang si Antonio Guillarawan,50.

Ang mga mamumuno nga riding in tandem giingong kalit nga gitaparan ang traysikol sa biktima samtang kini nagdagan diha sa Sitio Kolo, Barangay Pajac, Dakbayan sa Lapu-Lapu  ug gipusil kini sa makadaghang higayon.

Matud pa ni Police Master Sergeant Reynante Mahusay, desk officer sa Lapu-Lapu Police Station sakay sa biktima ang iyang kapuyo sa dihang kini gipusil.

Swerte hinuon nga wala maigo ang babaye samtang naigo sa iyang ulo ug nakabsan sa kinabuhi ang biktima.

Sa laing insidente sa pagpamusil, nalandig sa tambalanan ang usa ka tagiya og beauty salon human kini gisulod diha sa iyang establisamento sa wala mailhing mamumuno ug gipusil kini diha sa iyang liog.

Ang naangol mao si Charito Pacaña alyas Tata,43, nagpuyo sa maong lungsod ug nanagiya og beauty salon  diha sa Barangay Lipata.

Sigun pa ni Police Staff Sergeant Bobby Escarlan, Desk officer sa Minglanilla Police Station, naglimpyo sa iyang salon si Pacaña sa dihang miparada  nangabot ang riding-in-tandem ug ang backrider misulod sa salon ug gipusil ang biktima

Naigo sa walang bahin sa liog ang biktima ug daling nisibat ang mga mamumuno padung sa habagatan samtang gidala sa tambalanan ang biktima.

Personal nga away ang gitan-aw sa kapolisan nga motibo sa krimen. Sumala pang Escarlan pipila ka minuto sa wala pa mahitabo ang pagpamusil, giingong gisulong ug giaway ang biktima sa usa ka babaye. Duda nila nga gibalikan ang biktima sa iyang kaaway. (BANAT NEWS)