Kaso sa RTC isibog, reklamo sa Ombud magpadayon

CEBU, Philippines — Mo-withdraw ang kampo ni Governor Gwendolyn Garcia sa kasong sibil nga gipasaka niini batok kang kanhi gobernador ug karon bise gobernador Hilario Davide III ug kanhi mga opisyal sa Kapitolyo kalabot kini sa pagpatukod sa 20 ka andana nga Capitol Resource Center. Si Garcia nipasaka og kaso batok kang Davide, kanhi bise gobernador Agnes Magpale ug kanhi provincial administrator Mark Tolentino sa Regional Trial Court Branch 29 sa Dakbayan sa Toledo.

Matud ni Atty. Marino Martinquilla, ang legal consultant ni Garcia nga una silang ni-manifest nga i-withdraw ang kaso kay naghulat sila sa dokumento gikan sa Development Bank of the Philippines (DBP) alang sa terminasyon sa loan agreement kabahin sa maong proyekto.

Sa gipakita ni Martinquilla nga manifestation sa DBP, gisaysay niiini nga si Garcia nipadala sa DBP og sulat pagpahibalo nga dili apil sa iyang programa ang resource center ug wala siyay plano nga ipadayon kini. Subay niini, nipahibalo usab si Garcia pinaagi sa sulat ni Atty. Frank Dinsay ngadto sa maong bangko nga walay plano ang gobernador nga mopadayon sa loan.

Kahinumduman nga sa miaging administrasyon ni Davide, ang Kapitolyo misulod og kasabutan tali sa DPB aron mapundohan ang naasoy nga proyekto nga karon gipahunong ni Garcia. Nitataw hinuon si Martinquilla nga bisan pa man nga wala gidayon sa gobernador ang kaso, wala pa hingpit makalingkawas sila si Davide sanglit aduna pa may nag-ung-ong nga kaso sa buhatan sa Ombudsman batok sa maong mga opisyal subay gihapon sa pagpatukod sa resource center. (BANAT NEWS)