Sunog sa labogon, ibo nagbili’g P9.4 milyong danyos

CEBU, Philippines — Mokabat  P9 milyones nga kantidad ang gibanabanang danyos sa nasunog  nga furniture shop, usa ka residential  apartment, usa ka pabrika sa fiber glass ug usa ka panimalay nga nahimutang sa Tosing Compound sa Barangay  Labogon,  Dakbayan sa Mandaue nga nahitabo alas 4:30 ang takna sa hapon sa miaging Sabado.

Samtang moabot 150 ka balay sab ang naugdaw sa daplin sa kabaybayonan sa Sitio Tacan, Barangay Ibo, Dakbayan sa  Lapu-Lapu kagahapon sa kaadlawon.

Si Fire Officer 1 Jonrey Olmillo nga maoy field investigator sa Bureau of Fire Protection (BFP) sa  Dakbayan sa Mandaue miingon nga  hingpit nilang napawong ang sunog sa pabrika  alas- 6  na pasado Sabado  sa gabii. Padayon pa ang gihimong imbestigasyon sa sinugdanan sa maong sunod.

Si Olmillo miingon nga wala naangol   o  kinabuhing  nakalas atol  sa maong incidente.

Samtang sa Dakbayan sa Lapu-Lapu, si Nagiel Bañacia pangulo   sa Lapu-Lapu City Disaster Risk Reduction and Management Office   (CDRRMO)  miingon nga sagad sa nangasunog nga kabalayan sa Sitio Tac-an , Barangay Ibo naa nahimutang sa amihanang bahin sa runway sa Mactan Cebu International Airport  (MCIA)  sa Barangay Mactan  sa  Dakbayan sa Lapu-Lapu. Si  Senior  Fire  Officer 1  Hadji Samonte sa BFP  sa Dakbayan sa Lapu-Lapu miingon  nga  mokabat P400,000  ang gibilin  nga danyos sa maong sunog .

Matud  pa ni Bañacia nga ang mga naepektohan nga mga  pamilya ilang temporaryo  nga gipahimutang   sa Ibo  Elementary School ug ingon man ang uban kanila ang gipahimutang usab sa sports complex  sa nahisgotang lugar.

Si SFO1  Samonte miingon nga ilang nadawat ang alarma alas  12:55  ang takna sa miaging tungang  gabii ug gipasaka dayon task force bravo tungod sa kay sagad sa mga balay ginama sa mga gaay.

Alas 2:50 na sa kaadlawon kini hingpit nga nakontrolar.

Kahagip-ot sa lugar maoy usa sa mga nasugatan nga problema sa kabomberohan ilabi na nga sudlonon kaayo ang lugar.

Daghan sa mga nasunogan ang nanawagan nga sila hatagan og dinaliang hinabang kay kalab-anan kanila walay nabitbit nga mga kagamitan tungod sa kakalit sa hitabo. (Rowena Capistrano/IBM)(BANATNEWS)