Lalaki miambak sa Mactan Bridge patay

CEBU, Philippines – Patay nang nahaw-as gikan sa Mactan Channel ang usa ka 26 -anyos nga lalaki nga kataposang nakit-ang miambak sa Mandaue- Mactan Bridge sa habig nga bahin sa Barangay Looc,  Dakbayan sa Mandaue alas 10 pasado ang takna sa buntag niadtong miaging adlaw. Si Police Master Sergeant Juanito Libre sa Presinto 5  sa Mandaue City Police Office (MCPO) miingon nga usa ka lalaki nga giingong nangangkong amahan sa maong lalaki ang niila niini nga kini iyang anak nga ginganlan nga si Jestrate Singculan Tajanlangit nga taga Lungsod sa Cordova.

Matud pa ni Libre dunay sa mga nakasaksi nga niambak gikan sa railing sa maong taytayan si Tajanlangit ug pagtugpa sa dagat nilutaw kini ug wala na maglihok.

Sumala pang Libre usa ka mananagat nga nagsakay og sakayan nga naatol nga naagi sa ilawom sa taytayan daling nihikot sa lawas gamit iyang pisi ug gidala kini sa daplin.

Ang mga tawo nga nagpaabot sa daplin maoy nagtinabangay sa pagdala sa maong lalaki sa daplin diin nagpaabot usab ang sakop sa Emergency Rescue Unit Foundation (ERUF). Gisulayan kini sa pagtabang apan nakabsan gyud kini sa kinabuhi. Ang kapolisan naghimo pa og imbestigasyon kun unsay hinungdan sa paglayat niini. (/IBM)(BANAT NEWS)