Patay’ng lawas wala pa mailhi
CEBU, Philippines – Usa ka lalaki nga nilayat sa Mandaue –Mactan Bridge nga nahimutang habig sa Barangay Looc Dakbayan sa Mandaue niadtong Huwebes sa buntag ang wala pa mailhi.
Ang lalaki gibanabana nga nagpangidaron ngadto sa 35-anyos pataas, sakto ang panglawas, nagsul-ob og color green nga t-shirt ug maroon nga shorts ug gibana-bana nga 5’6 ang gitas-on sa pamarog niini.
Matud ni Police Corporal Jenus Capangpangan, duty investigator sa Station 5 sa Mandaue City Police Office nga nakadawat sila og report kabahin sa maong insidente.
Si Capangpangan nagkanayon nga dali sila nga niresponde ug pag-abot nila sa maong lugar wala na ang nahisgutang lalaki tungod kay nadala na kini ngadto sa Mandue District Hospital.
Apan ang maong lalaki gideklara sa doktor sa maong tambalanan nga patay na kini nga naabot.
Ang maong namatay wala pa kini mailhi ug ang kapolisan naghuwat kong adunay mosusi sa patay’ng lawas ug moila niini.
Ang kapolisan sa siyudad nakig-alayon sa silingang dakbayan ug niawhag sa publiko nga kong adunay sakop sa ilang pamilya nga wala mo uli ipasusi ang patay’ng lawas o makig-alayon sa Police Station 5. (/BDB)(BANAT NEWS)
- Latest