Mayor Samsam naalarma sa mga tulis

CEBU, Philippines – Naalarma si Mayor Gerald Anthony “Samsam” Gullas Jr. sa Siyudad sa Talisay sa sunod-sunod nga nahitabong tulis sa maong dakbayan.

Pinaagi sa iyang official Facebook account, si Mayor Gullas mitug-an nga makadaghan na siyang nakadawat og reklamo gikan sa iyang mga konstituwente labot sa ilang mga nasinati nga pagpanulis.

Gikaingon nga magpakaaron-ingnon nga pasahero sa jeep ang ubang tulisan, o diba kaha magmotorsiklo o manglabni ngadto sa mga biktima.

Gumikan niini, ang mayor nakigtagbo sa hepe sa kapolisan sa dakbayan nga si Police Major Orlando Carag Jr., aron isumbong ang mga reklamo nga iyang nadawat.

Iyang giingnan si Carag nga imbistigahan ang mga taho ug kon mahimo mailhan kining mga tawhana nga padayong namiktima sa mga inosenting Talisaynon.

Gusto sa mayor nga kon mailhan na, unta masikop ug pasakaan gyud og kaso sa mga nabiktima.

Nasayran, usa ka tinun-an ang katapusang ni-post sa social media sa iyang kasinatian samtang nagsakay og pasaheruang jeep sa miaging adlaw. (/DILT)(BANAT NEWS)