Angel gipatay sa wala mailhing tawo

CEBU, Philippines – Padayon pang gisusi karon sa kapolisan sa Siyudad sa Sugbo kon unsay motibo sa pagpatay sa 33-anyos nga lalaki kinsa gipusil sa wala mailhing mamumuno sa may Sitio Santo Niño II, Brgy. Luz sa naasoy nga dakbayan alas 12:30 kagahapon sa kadlawon.

Ang namatay giila nga si Angel Agustin, lumad nga taga Cagayan de Oro City sa Lalawigan sa Misamis Oriental.

Basi sa inisyal nga imbestigasyon sa mga sakop sa Mabolo Police Station nga matud sa saksi, nadunggan niini ang buto sa armas hinungdan nga dali kining nagpakitabang sa barangay hall nga maoy nanawag og ambulansiya ingon man sa kapolisan.

Dihang naabot sa nahitabuan, wala nay kinabuhi ang biktima dihang gihiling sa mga sakop sa Emergency Rescue Unit Foundation (ERUF) human kini nakaangkon og samad pinusilan sa iyang ulo.

Nakit-an sa crime scene ang usa ka kabhang sa wala pa matino nga armas, cellphone ug usa ka.gamay nga putos sa gituohang shabu.

Nunot niini, blangko pa ang kapolisan kon unsay motibo sa pagpatay sa biktima hinungdan nga nagpadayon ang ilang imbestigasyon sa background niini ug kon nganong naabot sa dapit ang biktima. (/DILT)(BANAT NEWS)