Babayeng pusher nakasibat, armadong hubog sikop
CEBU, Philippines — Nakasibat ang dakponong babaye nga durugista samtang nagtingkagol sa karsel ang armadong hubog sa nagkalain-laing lugar sa Siyudad sa Talisay niadtong Lunes.
Unang operasyon alas 4:40 sa hapon diin gisuwayan sa mga operatiba og palit og ginadiling drugas si Annafe Abrenica nga taga Sitio Crusher, Barangay Lawaan 3.
Apan sa dihang nagtinunolay na sa ilegal nga drugas nakabantay si Abrenica nga awtoridad ang iyang gikasabot hinungdan nga wala na kini nagpaabot nga makuptan.
Nakuhaan hinoon siya og ebidensya nga maoy hinungdan nga pasakaan siya og kaso.
Alas 6 sa gabii, usa ka Arnulfo Casulla, 49, taga Sitio Kimba, Barangay Cansojong ang nasikop human nakuhaan og armas nga walay lisensya.
Nakadawat og sumbong ang kapolisan labot sa armadong tawo sa ilang lugar ug dali nga girespondehan hangtud nga ilang nakita si Casulla nga nakainom og ilimnong makahubog nga adunay sling bag.
Nisiwil ang armas niini hinungdan nga siya gipangitaan sa dokumento apan wala nakapakita hinungdan nga siya gibalhug sa bilanggoan ug gikatakdang pasakaan og kaso. (GMR) (BANAT NEWS)
- Latest
