Trak natagak sa dagat

CEBU, Philippines — Nahagbong ngadto sa dagat ang delivery truck nga nagkarga og 200 ka sinakong bugas mais dihang padulong na unta kining isakay sa barko sa pantalan diha sa Dakbayan sa Danao alas 5 pasado ang takna niadtong Lunes sa  dihang kalit nga naputol ang rampa nga gilatayan niini.

Sumala pa sa Coast Guard Danao City Station isakay na unta ang six-wheeler truck ngadto sa MV Mika Mari VI nga mobiyahe paingon sa Consuelo Port  sa Lungsod sa San Fancisco, Isla sa Camotes. Apan tungod sa kabug-aton niini naputol ang rampa hinungdan nga natagak kini sa dagat. Swerteng nakalayat dayon ang drayber ug ang helper niini nga luwas na ang kahimtang.

Tungod niini gimandoan sa PCG ang kapitan sa nahisgotang barko sa pagduso og marine protest sa dili pa usab hatagan og pagtugot alang sa ilang pagbiyahe.

Ang MV Mika Mari VI gipanag-iya sa Jomalia Shipping nga adunay 94 ka pasahero ug 10 ka mga  rolling cargoes. Tungod sa insidente gibalhin sa laing barko ang mga karga niini. (IBM) (BANAT NEWS)