Mga pasahero natanggong

CEBU, Philippines — Gibanabanang kapin 500 ka mga pasahero ang nangatanggong sa nagkadaiyang mga pantalan dinhi sa Sugbo tungod sa kadaotan sa panahon ug nakapadagko sa bawod sa kadagatan.

Bisan og walay gipagawas nga gale warning ang PAGASA Central Visayas kagahapon, ang mga operators na mismo sa nagkadaiyang gagmay nga pasaheroang mga barko ug pumpboats boluntaryong nikanselar sa ilang mga biyahe.

Base sa talaan sa coastguard ang mga biyahe nga kanselado mao ang padulong sa Ormoc; Tagbilaran, Getape, Pitogo, Cadiz, Negros Occidental, Estancia Negros Occidental ug Kawayan sa Masbate.

Hasta ang mga biyahe gikan sa Taloot sa Lungsod sa Argao, Cordova nga paingon sa Bohol gikanselar sab. Ang Supercat padung unta sa Dakbayan sa  Ormoc ug ang Roble Shipping Lines paingon sa Hilongos, Leyte nikanselar sab. Dugang mikanselar sa ilang mga  biyahe ang Ocean Jet paingon sa Tagbilaran City ug ang uban pang shipping lines nga mobiyahe paingon sa Getafe sa Bohol. Si Lieutenant Junior Grade Michael John Encina nga maoy tigpamaba sa PCG Central Visayas miingon nga ang operators ang midesisyon nga di mobiyahe.

Ang PCG Central Visayas gialerto karon aron daling makaresponde kun gikinahanglan. Tungod sa padayon nga pag-ulan nga nipakusog sa hanging habagat ug sa bagyong Falcon didto sa Luzon, ang Provincial Disaster Risk Reduction and Management Office (PDRRMO) niawhag sa kalungsoran ug mga dakbayan sa tibuok lalawigan nga mag-amping ug mag-alerto.

Matud ni Baltazar Tribunalo ang pangulo sa PDRRMO nga anaa na sa mga LGUs ang pagbuot kun angay ba nga isuspenso ang klase sa ilang mga lugar depende sa sitwasyon sa panahon. “Bisan og kapitan, school head o mayor maka declare og suspension of classes,” matud ni Tribunalo. Ang lungsod sa Alegria una nang nisuspenso sa klase sa tibook lungsod pribado ug pampublikong mga tunghaan sa elementarya ug high school.

Gibantayan og maayo ang pagbaha sa Malabuyoc, Argao, Sibonga, Badian, Alegria, Aloguinsan, Pinamungajan, Sangi sa Toledo, Balamban, Talisay ug Mandaue City. (IBM) (BANAT NEWS)