Laing 80 ka balay naugdaw sa Lapu-Lapu

CEBU, Philippines — Naugdaw ang dul-an sa 80 ka balay sa laing sunog sa Dakbayan sa Lapu-Lapu alas 8:24 sa niaging Domingo sa gabii sa Sitio Bato, Barangay Maribago.

Hingpit napawong ang sunog alas 10:20 na sa gabii diin sumala pa ni City Fire Marshal Fire Superintendent Crispulo Eusebio ang kayo nagsugod sa ikaduhang andana sa panimalay ni Faiden Pacilan.

Si Nagiel Bañacia, pangulo sa City Disaster Risk Reduction and Management Office, niingon nga temporaryo nga gipahimutang sa Bagumbayan Gym sa Barangay Maribago ang mga nasunogan samtang pipila kanila gipahimutang sa Barangay Mactan Sports Complex.

Electrical short circuit gikan sa poste maoy gituohan nga hinungdan sa sunog. Matud ni Senior Fire Officer 1 Hadji Samonte, fire investigator sa Dakbayan sa Lapu-Lapu, nga ipaubos pa nila sa imbestigasyon ang hinungdan sa sunog apan base sa pamahayag sa pipila ka residente nga nagsiga-siga nga wire gikan sa poste ang nakita nga nipadulong sa panimalay ni Pacilan.

Dugang pa ni Samonte nga mangaylap pa sila og mga saksi lakip usab ang pag-imbitar sa tag-iya sa panimalay diin gituohang didto nagsugod ang sunog aron ila kining makuhaan og pamahayag.

Gibana-bana nga mokabat sa P250 mil ang danyos sa sunog nga nahimutang sa interior portion sa lugar ug nakahatag og gamay nga kalisud sa kabomberohan.

Ang sunog maoy ikaduha human sa sunog sa Barangay Gun-ob sa maong dakbayan sulod sa 24-oras.

Wala hinooy natala nga naangol o nakalas sa maong insidente.

Samtang ang mga biktima sa sunog sa Purok Ube, Barangay Gun-ob ang makadawat og hinabang pinansiyal gikan sa kagamhanan sa dakbayan human sa pagkompleto na sa listahan sa City Social Welfare and Development Office sa mga pangalan sa biktima.

Kini ang gipahibawo ni Mayor Junard “Ahong” Chan nunot sa iyang pagpaneguro nga makabalik sila sa pagtukod sa ilang mga balay sa luna nga ilang giokupar sanglit mohimo  siya og sabot-sabot sa tag-iya sa maong luna.

Ang mga biktima nga maoy tag-iya sa nasunog nga panimalay ang makadawat og P10,000 samtang P3,000 ngadto sa P5,000 sa mga nag-abang. (BANAT NEWS)