6 sikop sa buy-bust sa Jaclupan

CEBU, Philippines — Nasikop ang unom ka mga tawo ug usa ang nakasibat sa gipahigayong buy-bust operation nga gihimo sa mga tinugyanan sa Provincial Intelligence Branch, lakip ang pagpuhag sa drug den nga nahimutang sa may Sitio Tabuc Sapa, Brgy. Jaclupan sa Dakbayan sa Talisay kagahapon sa buntag.

Nasikop sa maong operasyon sila si Maica Jaberina, ang target sa buy-bust ug ang tigmintenar sa drugden, Roldan Papas, Ruel Carael, William Caparida, Aljun Caparido, ug Virgillo Jaberina mga bisita sa drug den, samtang ang naka-eskapo mao si Junil Cabiluna.

Nangulo sa maong operasyon si PSUPT Marlu Conag, pangulo sa PIB uban sa pakig-alayon sa PDEA RO-VII ug Talisay City Police Station nga gipangulohan ni PMAJ Orlando Carag.

Nasakmit gikan sa mga dinakpan ang 14 ka mga pinakite sa gituohang shabu nga nitimbang og 15 gramos nga mobalor og P102 mil basi sa Dangerous Drug Board ug mga kagamitan sa pagsuyop sa ginadili nga drugas.

Ang mga dinakpan nagtingkagol na karon sa lock-up jail ug gipaabot nga pasakaan og kaso nga kalapasan sa Section 3, 6, 7, 11, 12 ug 15 sa Article II sa R.A. 9165. (BANAT NEWS)