Mag-uuma nagkaon gidunggab patay

CEBU, Philippines — Patay ang 35-anyos nga lalaki human kini gidunggab sa usa ka mag-uuma samtang nagkaon kuyog sa iyang pamilya sulod sa ilang payag sa may Barangay Casay, Lungsod sa Dalaguete alas 5 pasado sa hapon niadtong Sabado.

Ang nakalas naila nga si Antonio Alpas Jr, dunay kapuyo, residente sa maong lugar, samtang ang suspek mao si Danilo Dorola, 53, silingan sa biktima.

Matud ni Police Staff Sergeant Arnold Frinal, desk officer sa Dalaguete Police Station, nga sa inisyal nga imbestigasyon nagkaon ang biktima kuyog sa iyang pamilya dihang niabot ang suspek dayun dunggab kang Alpas.

Sa dihang natumba si Alpas, didto giyak-an kini ni Dolora ug gidunggab sa makadaghang higayon hangtud kini namatay.

Human sa maong insidente dali ra sab nisibat ang suspek apan atol sa gihimo nga follow-up operation nasikop ra usab si Dolora.

Sa pagkakaron nagtingkagol na sa lock-up jail ang mamumuno ug gipaabot ang pagsang-at sa tukma nga kaso batok niini. (/GMR)(BANATNEWS)