Mediation program ibalik sa DOJ

CEBU, Philippines — Subling ipatuman sa Department of Justice ang mediation program ubos sa National Prosecution Service (NPS) human kini napakyas sa niaging katuigan.

Ang Siyudad sa Sugbo ang usa sa pilot areas sa pagpatuman sa Rules of the NPS mediation program nga gimando ubos sa Republic Act 9285, o ang Alternative Dispute Resolution (ADR) Act of 2004.

Si Cebu City Senior Assistant City Prosecutor Rhodna Bacatan ang gitudlo nga mediation coordinator sa maong programa.

Kini gigastuhan sa European Union, ang Office of the Alternative Dispute Resolution (OADR) sa DOJ ug Governance for Justice (GO JUST) ang nagpahigayon og lima ka adlaw nga training on mediation nga giapilan sa mga piskal sa Cebu City, mga abogado ug mga pribado nga propesyonal.

Ang unang batch nga 35 kabuok ang nakahuman na niadtong Biyernes samtang and ikaduhang batch nga sama ang gidaghanon magsugod sab karong adlawa. Ang mga nakahuman sa training ipaubos na usab sa 40 ka adlaw nga internship program isip standard sa OADR aron malakip sa roster of accredited mediators.

Atol sa pagbukas sa training, si DOJ Undersecretary Adrian Ferdinand Sugay nibutyag sa nagtapun-og na nga kaso sama sa Dakbayan sa Sugbo nga niabot na sa 13,461 hinoon dili tanang kaso ang “mediatable.”

Ang ADR Act of 2004 nagmando sa pagpaubos sa mediation sa mga kaso nga naglambigit lang og dili mosobra sa P200,000 nga kantidad sa theft, qualified theft, estafa, criminal negligence resulting in damage to property ug violations sa Batas Pambansa Bilang 22, o ang Bouncing Check Laws.

Gipasabot ni Atty. Hector Soliman sa GO JUST nga tuyo sa programa nga matabangan ang pagrespolbar sa susamang mga kaso.

Matud ni Soliman nga kinahanglan nga sa sayong bahin pa lang sa imbestigasyon mapaubos na sa mediation diin sabotan sa isigka-habig ang unsa nga solusyon nga dili na moabot sa korte.

Sumala pa usab ni Senior Deputy State Prosecutor Richard Anthony Fadullon nga kung unsay sayop sa niaging pagpatuman sa programa angayang usbon sa pagkakaron ang magmalampuson ang ikaduhang pagsuway. (BANATNEWS)