Drug Queen sa Tabunok nadakpan

CEBU, Philippines — Drug queen ug iyang alalay ang nasikop sa Drug Enforcement Unit (DEU) sa Talisay City Police sa gihimo nga buy bust operation diha sa usa ka pension house sa Mansueto St., Barangay Tabunok, Dakbayan sa Talisay niadtong Sabado sa gabii.

Ang dinakpan mao si Gloria Banquicio Morales alyas Inday, 45, ug ang iyang alalay nga si Jeenel Sahol Cabañero,18, parehong nagpuyo sa Sitio Mananga, Barangay Tabunok sa maong syudad.

Si Police Captain Nazarino Emia, deputy chief sa kapulisan sa maong siyudad nitug-an nga taud-taod na nila nga gimonitor si Morales hangtud nga natigayon gyud ang operasyon sud sa giabangan nga lawak.

Nakuha gikan sa mga dinakpan ang shabu nga nitimbang 12 gramos ug mga drug paraphernalia lakip na ang buy bust money. Ang ilegal nga drugas nga nakuha nibalor sa P81,600.

“Clever ni siya’ng bayhana, iya pa mi nga giduwa-duwaan kung asa sila nga kwarto,” nagkanayon si Emia. Nagkanayon si Emia nga ang drugas nga nagtuyok sa Mananga iya ni Morales mao nga gianggaan siyang “Drug Queen” sa maong dapit.

Siya maoy nakasunod sa iyang bana nga natanggong na sa Talisay City Jail.

Samtang siyam ka tawo ang nasikop sa managlahing anti-illegal drug operations nga gilusad sa kapolisan sa Lapu-Lapu City diin P100 mil nga gituohang shabu ang nasakmit.

Si Police Lieutenant  Jose  Leo  dela Fuente sa CIB  maoy nangulo  sa  buy  bust  operation diha sa Sitio  Sta.   Maria,  Barangay  Pusok ug nasikop si McAxel  Lobetaña  Puasa, 22.

Samtang  sa  Sitio Lasang, Barangay Mactan pito ka gidudahang drug pushers ang nadakpan nga giilang sila si James Castellano Ricafranca, 36, Jomar Peñaranda Pacheco, 24, nga handler og K9  Dog, Jufin Menardo Alvia, 20,  Roland Cagatan Tomogsok, 20, Jovy Gomez Alivio, 37,  ug Mary Fe Geraldeso Isok, 38, parehong taga  Tulo-tulo, Consolacion.

Si  Police   Major  Miguel  Andeza  nga maoy hepe sa   kapolisan  sa Presinto  2   sa  LLCPO  miingon  nga  nakuha  gikan  sa maong  mga dinakpan   ang 13  ka   paketeng   shabu nga P60,592.00  ug  ingon  man  buy bust   money.

Laing nadakpan sa mao gihapong dapit sila si Ryan Auditor Salipong, 35, ug Rodelyn Arong Pulistico, 40 nga nasakmitan og pinaketeng gidudahang shabu.

Sa operasyon sab sa kapolisan diha sa Lower Calajuan, lungsod sa Minglanilla, nadakpan ang pito ka mga tawo ug nakuhaan og 39 ka mga putos sa gidudahang drugas nga mokantidad og P82 mil, buy bust money, libo kapin nga gituohang halin ug cellular phone.

Ang mga dinakpan nagtingkagol na karon sa lock-up jail ug gipaabot ang pagpasang-at ug tukma nga kaso nga violation of Article II of RA 9165

Samtang sa Dakbayan gihapon sa Talisay, duha ka managsuong babaye ang gidakop sa mga sakop sa Provincial Intelligence Branch (PIB) sa Cebu Provincial Police Office (CPPO) diha sa Barangay San Roque tungod sa pagpamaligya og illegal nga drugas.

Ang mga dinakpan nailhan nga si Elsie Estrera Bacalso, 55, biyuda ug si Ophelia Bacalso Bardilas, 59, nagpuyo ang duha diha sa maong lugar.

Wa maglisud ang mga operatiba gumikan kay dali ra nga nisakay sa poseur buyer ang duha. Nakuha gikan kanila ang 47 ka gagmay nga pakete, tulo ka medium nga pakete sa shabu nga nikantidad og kapin P100 mil ug ang buy bust money nga gigamit sa transaksyon.

Apan atoll sa imbentaryo sa mga ebidensya, kalit nga nisaka ang blood pressure ni Elsie maong gitabang kini ug gidala sa Talisay City District Hospital. Ang duha pasakaan og kaso karong adlawa. (Rowena Capistrano ug Romeo Limpangog/IBM)(BANATNEWS)