Kanser wala makapugong sa magtiayon nga makasal sa pari

CEBU, Philippines — Bisan sa mga bagyo sa pagsulay nga miabot sa kinabuhi sa managtiayon nga taga Brgy. Mambaling, Cebu City, wala kini makapahuyang kanila ilabi na sa asawa kinsa naghambin og sakit nga kanser sa iyang tagoangkan aron sa pagkab-ot sa iyang  damgo nga mahigot sa talikala sa kaminyuon ngadto sa lalaki nga natingban sa iyang gugma pinaagi sa kasal nga gipahigayon sa ilang panimalay inay sa simbahan.

Ang maong kasinatian, kasamtangang gitagamtam karon sa 35-anyos nga si Pinky Veloso, adunay stage 4 sa sakit nga cancer sa ovary. Niadtong miaging buwan sa Hunyo lang niya kini nasayran human siya nagpa-opera sa pagtuo nga sakit lang kini sa bato o appendicitis.

Asoy ni Pinky nga sa miaging tuig 2018, nagtuo siyang normal lang ang gipamati nga Dysmenorrhea, hangtod nga sayo niining tuiga nibati na siya og sakit sa iyang kilid, nawagtangan na siya og gana sa pagkaon, ug kanunay nalang siyang maghigda hinungdan nga miundang nalang siya sa iyang trabaho aron makapahulay.

Gitug-an niya nga tungod sa iyang gibati, giaghat na siya sa iyang inahan ug sa iyang kapikas nga mopaubos sa general check-up. Dinhi na nasayran nga adunay dagku nga mga cyst sa iyang ovary ug niadtong Hunyo 26, gi-operahan siya ug dinhi usab nasayran nga anaa na siya sa stage 4 sa Bilateral Adenocarcinoma.

Matud ni Pinky nga bisan sa iyang gihambin, mapasalamaton siya kay wala nibiya ang iyang bana ug nagpadayon kini sa pag-atiman ug paghago alang kaniya, hinungdan nga malaumon siya nga padayon kining magmadasigon.

Mapasalamaton usab siya nga natuman ang dugay na niyang gipangandoy nga makasal gayud sa pari bisan ug wala sa simbahan.

Nagsugod ang istorya sa gugma ni Pinky niadtong tuig 2000 diin tinun-an  pa sila sa iyang pares nga si Gregorio Veloso Jr. sa University of San Jose-Recoletos. Pagkasunod tuig niana sila nagkauyab.

Si Gregorio sa iyang bahin miasoy nga nagsugod sa simpleng “Hi and Hello” ang ilang relasyon ni Pinky nga miresulta diin iyang gihulagway nga ang iyang asawa maoy iyang seryosong nakarelasyon.

Pagka tuig 2006 gikasal sila sa huwes. Bisan paman niini, nangandoy gyud si Pinky nga mopaso sa altar sa kaminyuon, apan tungod sa mga kakulian nauktaba ang ilang mga plano.

Nagpadayon ang iyang pag-ampo bisan sa iyang gibati ug hingpit gyud kining nahitabo niadtong Biyernes nga makasal sa pari ingon man makadawat og laing upat pa ka sakramento nga naglangkub sa konpirma, kumpisal, misa, ug hilog sa masakiton, samtang ang iyang bana nakadawat og sakramento sa bunyag, konpirma, misa ug kaminyuon.

Gitug-an ni Gregorio nga adunay mitambag kanila nga moduol sa kaparian aron matuman ang ilang gipangandoy nga makasal ingon man makadawat ang kapikas og complete healing sa sakit nga      gihambin.

Subay niini, mapasalamaton siya kay wala nakawang ang iyang pagduol kang Rev. Fr. Mhar Vincent Balili, human kini nisanong ug gipalihok gilayon sila sa mga dokumento hangtud nga gikasal sila niadtong Biyernes sa hapon.

Si Gregorio, nitug-an nga natubag ang  pag-ampo sa iyang asawa ang nahitabo kanila ug sayud siya nga pagsulay ra ang ilang giatubang karon ug ila nang gihalad ngadto sa Ginoo ang tanan ilabi na ang sakit ni Pinky.

Ang duha susama og mga pulong nga giluwatan nga magpabilin ang ilang gugma sa usag-usa ug padayon lang sila bisan sa mga pagsulay alang sa ilang giugmad nga pamilya uban sa ilang duha ka mga anak nga sila si Harriet Brea, 12-anyos ug Humprey, 10-anyos.

Gipahibawo ni Fr. Balili nga ang simbahan adunay liturgical space kon asa kaslon ang duha ka binuhat nga buot magpahigot sa talikala sa kaminyuon. Kini mahitabo sa simbahan o sa giila nga kapilya apan tungod sa pastoral nga rason ug sa kahimtang sa kaslonon ilabi na sa asawa nga dili na makabarug ug anaa na sa terminal illness, gihatagan kini og konsiderasyon nga sa balay himuon ang seremonyas basta adunay dignidad, lamisa, mantil ug kandila nga gihimo usab sa banay sa magtiayon.

Dugang sa pari nga tungod sa gihambin nga sakit sa asawa gihatag nila ang tanang sakramento alang sa kaluwasan sa kalag.

Iyang gitug-an nga dihang midangop kaniya ang bana dala ang tinguha makasal kini sa iyang asawa atubangan sa pari, wala siya magduha-duha sa paghatag sa maong mga gasa. Pagpakita usab kini nga anaa ra silang mga pari ug dili mahal ang kaminyuon nga maoy hinungdan sa uban nga magpuyo-puyo nalang.

Makigtagbo pa usab si Balili sa pamilya kon unsa pa ang ilang matabang ilabi na sa chemotherapy unya ni Pinky.

Si Balili giubanan nila ni Fr. Alden John Baran ug Rev. Niel Cortes aron mahitabo ang santos nga misa ug matigayon ang mga sakramento ngadto sa magtiayon sulod sa ilang panimalay sa Sitio Tromar, San Roque sa Brgy. Mambaling.

Ang magtiayon niawhag ngadto sa mga nagpuyo-puyo sa pagduol gayud sa kaparian sa ilang mga parokya ug magpatabang nga makasal o kaha makaapil sa mga mass wedding. (/DILT)(BANATNEWS)