Proyekto nga gigahinan og pundo sa PAGCOR ipa-review

CEBU, Philippines — Ang konseho sa Dakbayan sa Sugbo nigama og komitiba nga maoy mo-review sa mga proyekto diin ang pundo gikan sa Philippine Amusement and Gaming Corporation (PAGCOR).

Tumong niini nga masiguro nga ang mga proyekto nisubay kini sa mga lagda o sumbanan.

Atol sa regular session niadtong Martes, giaprobahan sa konseho ang resolusyon ni Konsehal Raymond Alvin Garcia nga nagmugna sa nahisgutang komitiba nga mag-review sa mga proyekto nga ang pundo gikan sa PAGCOR ug permit sa mga gaming ug amusement.

Ang maong komitiba pangulohan ni Konsehal Renato Osmeña, Jr. ug mga miyembro niini sila si Garcia ug Konsehal Phillip Zafra.

“There is a need to review projects and programs charged to Cebu City’s Pagcor funds to ensure its implementation”, tipik sa resolusyon.

Ang siyudad makadawat kada bulan og financial assistance gikan sa mga pondo sa Pagcor isip bahin sa operasyon sa mga gaming center ug casino sa siyudad.

Ang maong pundo gamiton kini alang sa mga livelihood project, scholarship, infrastructure projects nga gikinahanglan sa komunidad ug mga proyekto kalabutan sa serbisyo sa        panglawas.

Ang pundo mahimo usab nga gamiton alang sa mga proyekto nga makapauswag sa  kahapsay ug sa siyudad, pagpaabot sa emergency nga tabang ngadto sa mga biktima sa natural nga kalamidad, terorismo, mga proyekto nga makatabang sa mga kabus ug uban pa.

Sa laing bahin, si Konsehal Eugenio Gabuya ni-refer sa iyang duha ka resolusyon ngadto sa maong komitiba.

Ang una sa duha ka resolusyon ni Gabuya mao ang paghatag sa hingpit nga amusement tax exemption sa gross admission receipts sa Spotlight Dance Studio nga naghupot sa fundraising recital karong adlawa diha sa Cinema 1 sa SM City Cebu ug ang ikaduha mao ang pag-uyon sa aplikasyon sa Toledo E-Games, Inc. aron mag-operate sa usa ka e-games outlet sa PAGCOR diha sa Barangay Basak San Nicolas ug Suba, Dakbayan sa Sugbo. (/BDB)(BANATNEWS)