Kawani sa DepEd, minor, laing 5 sikop sa buy-bust

CEBU, Philippines – Gitanggong sa detention cell sa Lapu-Lapu City Police Office (LLCPO) ang lima ka pushers kinsa nadakpan sa managlahing takna ug dapit sa mga sakop sa City Intelligence Branch (CIB) ug City Drug Enforcement Unit (CDEU) sa kapolisan sa Dakbayan sa Lapu-Lapu.

Si Police Captain Felix Cleopas III maoy nangulo sa anti-illegal drug operation alas 3 pasado niadtong Huwebes sa hapon sa Sitio Kadulang, Marigondon sa maong dakbayan.

Giila ang nadakpan nga si Pedro Ongco Muñez, 57, nagtrabaho isip Administrative Aid  III sa Department of Education (DepEd) sa Dakbayan sa Lapu-Lapu.

Nadakpan sab sa kapolisan ang anak niini nga si Carlo Enghug Muñez, 27, walay trabaho, kinsa nakuhaan og pito ka pakete sa shabu nga balor og P19,380.

Laing nadakpan mao si Aquilino Boniel Ngujo, 23, nagpuyo sa Mahayahay, Bankal sa maong dakbayan ug Jayson Linao Malingin, 21, nagpuyo sa mao gihapong dapit. Nakuha sa kapolisan gikan sa maong mga dinakpan ang 17 ka pakete sa shabu nga kantidad og P23,936.

Samtang sa Sitio Lasang, Barangay Mactan nadakpan si Jomer Villaver Castro, 30, usa ka habal-habal driver kinsa nakuhaan og siyam ka pakete sa shabu nga kantidad og P9,360.

Samtang nasikop ang usa ka mamaligyaay og ilegal nga drugas sa gihimong operasyon sa kapolisan sa Siyudad sa Talisay sa Sitio Mahayahay, Barangay Cansojong niadtong Huwebes sa gabii.

Ang nadakpan mao si Shreddmar Notarte alyas Dennis Ventura, 36, kinsa nasikop sa mga sakop sa Drug Enforcement Unit sa Talisy City Police Station gumikan sa sunod-sunod nga reklamo sa ilegal nga kalihukan niini.

Atol sa operasyon wala mag-agi og kalisud ang mga operatiba tungod kay dali ra nga nikagat ang ilang subject sa operasyon.

Nakuhaan kini og duha ka gagmay ug usa ka medium nga pakete sa ginadiling drugas, usa ka pouch nga walay sulod, P200 nga buy-bust money ug P200 nga halin sa pagbaligya og shabu.

Ang ebidensiya nga nakuha nitimbang og 5.04 gramos nga adunay balor nga P34,200.

Usa sab ka menor de edad ang nasikop sa mga tinugyanan sa Mambaling Police Station atol sa buy-bust operation sa may Sitio Chicago, Barangay Duljo Fatima alas 2 sa kaadlawon kagahapon.

Ang 17-anyos nga lalaki residente sa may Sitio Avocado Street, Barangay Mambaling, Siyudad sa Sugbo. Nasakmit gikan kaniya ang pinutos sa ginadili nga drugas nga motimbang og 120 gramos nga mobalor og P816 mil. (Gabriel C. Bonjoc/GMR)(BANAT NEWS)