Mga kongresista papangayuon og pundo sa national

CEBU, Philippines – Niawhag si Gobernador Gwendolyn Garcia ngadto sa mga kongresista sa pito ka distrito sa Lalawigan sa Sugbo nga mangayo og pundo sa national government alang sa ilang tagsatagsa ka district jail.

Matud ni Garcia nga ang mga district jail maoy anaa sa posisyon nga makapangayo og pundo gikan sa nasudnong kagamhanan nga magamit sa pagpalapad sa mga pasilidad sa prisohan aron maluag kini.

Gihimong example ni Garcia ang gihimo ni Congressman Benhur Salimbangon sa 4th district kaniadto.

“I will point out during the time of Congressman Benhur Salimbangon nakapangayo gyud siya og funds sa national government to expand the district jails. And I hope our representatives can cue from there”, matud ni Garcia. Matud ni Garcia nga ang kahuot sa jail facilities ilabi na sa Cebu Provincial Detention and Rehabilitation Center (CPDRC) maoy usa sa iyang problema karon.

Si Garcia nagkanayon nga gawas sa pagbalik sa dancing inmates una niyang sulbaron sa CPDRC mao ang congestion ug ingon man seguridad sa maong pasilidad.

Sa pagkakaron ang CPDRC adunay kapin 2 mil ka piniriso. (/BDB)(BANAT NEWS)