Modernong PUVs gilusad, gihangop
CEBU, Philippines – Gihangop sa mga pasahero ang paglusad kagahapon sa Land Transportation and Regulatory Board in Central Visayas (LTFRB-7) sa mga modern nga public utility vehicles (PUVs) nunot usab sa paghatag na og bag-ong prangkisa nga maoy magtugot sa pagpadagan niini sa Metro Cebu area alang sa pagpamasahero.
Ang maong kalihukan gitambungan sa mga drivers, operators nga misuporta sa nasudnong kagamhanan.Ang mga PUV nga naglakip sa 300 ka taxi, 110 ka mga bus ug 100 ka solar-powered jeepneys nga mahimong makapasahero sa mga rota gikan sa Dakbayan sa Sugbo paingon sa lainlaing mga lugar sama sa Dakbayan sa Danao, Lapu-Lapu ug Cordova.
Si LTFRB-7 director Eduardo Montealto Jr., miingon nga ang mga bag-o usab ang prangkisa sa maong mga PUVs nga nagbaton og automatic fare collection system diin ang mga pasahero mobayad pinaagi og beep cards nga igo nalang isaghid o sa pag tap niini sa machine inig sakay.
Gitinguha sa LTFRB nga makabaton og dugang sais mil ka mga PUV sa Metro Cebu nga magbaton og susamang pamaagi sa pagplite ug aduna usab kini GPS, WiFi, curb side door, dash camera ug uban pa. Gitataw usab ni Montealto nga ang pagpadagan sa maong matang sa mga sakyanan kabahin sa hinay-hinay nga paghatag og katumanan sa gitinguha sa pagsagop sa PUV Modernization Plan sa Department of Transportation aron kahatagan og hamugaway ug luwas nga pagsakay sa mga pasahero sa nasud.
Giklaro usab sa direktor nga dili ma-phase out ang mga karaang PUV apan i-modernized lang. Nasayran nga ang rehiyon adunay 34 mil ka nagkalain-laing PUVs.
Subay niini, si Guillermo Jr., driver ug operator sa Inayawan Transport Cooperative (INTRASCO) miasoy suportado nila ang programa sa national government nga PUV modernization tungod kay kaayuhan sab kini nila og makatabang sab sila nga mamenusan ang polusyon sa palibot. Gidapit sa maong kalihukan si Presidential Assistant for the Visayas Michael Dino kinsa mitug-an nga unang nakasinati sa PUV modernization mao ang mga taga Tacloban ug nahimong modelo sa tibuok nasud ang pag-implementar niini. (Decemay P. Padilla/DILT)(BANAT NEWS)
- Latest