Bag-ong hepe sa CCPO molingkod karon
CEBU, Philippines – Pormal na nga nilingkod karong adlawa ang bag-ong city director sa Cebu City Police Office (CCPO).
Matud sa direktor sa Police Regional Office (PRO)- 7 Police Brigadier General Debold Sinas nga pormal na nga nanumpa si Retired Police Colonel Royina Garma didto sa palasyo sa Malacañang isip General Manager sa Philippine Charity Sweepstakes Office (PCSO).
Nasayran nga si Garma, direktor sa CCPO, nag-early retirement kini sa iyang trabaho isip polis tungod kay gitudlo kini nga general manager sa PCSO.
Ang classmate ni Garma nga si Police Colonel Gemma Vinluan mao ang gitahasan nga mopuli sa pwesto isip direktor sa CCPO.
Ang tigpamaba sa CCPO nga si Police Captain Arrieza Otida nibutyag nga sa open grounds sa Camp Sotero Cabahug himuon ang turnover ceremony diin giimbitar ang mga direktor sa tagsa-tagsa ka mga buhatan sa gobiyerno lakip na ang mayor sa Dakbayan sa Sugbo.
Matud ni Otida nga sa pagkakaron wala pa matino kon ipadayon ba ni Vinluan ang mga nasugdan na nga mga programa ug proyekto ni Garma diin lakip na niini ang “Itug-an ni CD”.
Ang “Itug-an ni CD” mao ang platform diin mamahimong mosumbong ang kumunidad ngadto sa mga polis kabahin sa tanang matang sa krimen sa Dakbayan sa Sugbo aron dali kining maaksiyonan sa kapolisan. (/BDB)(BANAT NEWS)
- Latest