Babayeng kiriwan napalgan patay

CEBU, Philippines – Usa ka babaye nga giingong hilabtanon ang napalgang patay sa Barangay Cuanos, Lungsod sa Minglanilla kagahapon sa buntag.

Ang maong babaye giila sa iyang mga paryente nga si Arshiella Caballero, 27-anyos, adunay usa ka anak nga taga Barangay Lagtang, Dakbayan sa Talisay. Ang inahan ang positibong niila sa biktima.

Si Insp. Sylvanos Abella sa Minglanilla Police Station niingon nga unang nakit-an sa mga bata ang lawas ni Caballero nga nag-ubo.

Gumikan sa ilang kahadlok nitawag sila sa mga hamtong ug mao na kini ang nipahayang aron makit-an ang dagway.

Nabulit sa kaugalingong dugo ang puti nga senina sa biktima ug gani dayun kini nailhi sa mga polis kung wala motumaw ang inahan niini.

Nahibaw-an nga adunay usa ka samad pinusilan sa dughan ang biktima.

Sa gipahigayong pagsusi, matud pa sa desk officer sa Minglanilla Police Station, Police Staff Sergeant Jorge Tapales, nga alas 3 sa hapon niadtong Martes nakamatikod ang mga residente sa dapit nga adunay duha ka tawo nga sakay sa usa ka itom nga Honda XRM nga motorsiklo nga niadto sa maong dapit.

Nadunggan na lang nila ang usa ka sipang boto, apan giingong wala ra nanumbaling ang mga tao sa dapit niadtong tungora.

Pangagpas sa kapolisan nga posibleng gidala ang maong biktima sa dapit ug didto na gipatay sanglit layo kaayo ang distansya sa puy-anan sa biktima ug sa lugar diin siya nakaplagang patay.

Gikompirmar ni Tapales nga sa ilang record, kapila na nga nadakpan sa niaging tuig si Caballero sa kasong pagpangawat apan wala na lang kini padayona sa mga reklamante sanglit pirme kining mapasaylo.

Nakalihay

Samtang usa ka 40-anyos na lalaki ang nakalihay dihang gipusil sulod sa balay sa wala pa mailhing duha ka kriminal sa Sitio Lower Busay, Barangay Busay, Dakbayan sa Sugbo niadtong Martes sa hapon.

Giila ang biktima nga si Roy Pangautan alyas Eliot, taga Barangay Bitoon, Carmen.

Giingong ang biktima didto sa balay sa iyang bayaw kinsa niadtong higayuna nagpakaon sa anak sa dihang may nikalit og siyagit sa gawas og “Eliot, gawas diha sa balay!”

Sa pagkadungog niini daling nakalayat sa bintana ang biktima apan nisulod sa balay ang mga kriminal ug gipusil si Eliot samtang nagdagan ug nakalihay. Daling nakaikyas ang duha ka kriminal. (Camille L. Pateres ug Rose Carmel De la Cerna/GMR)(BANAT NEWS)