Habalhabal driver gisuwayan og patay
CEBU, Philippines – Naluwas sa hingpit nga kamatayon human nakaangkon og mga samad-pinusilan ang 56-anyos nga drayber sa habalhabal nga gipusil sa riding-in-tandem sa may Brgy. Canduman sa Dakbayan sa Mandaue, pasado alas sais sa gabii niadtong Lunes.
Si Police Master Sergeant Nestor Montecillo sa Presinto 6 sa Mandaue City Police Office miila sa biktima nga si Reynaldo Vega, taga Purok 5 sa Brgy. Cubacub sa naasoy nga dakbayan.
Giingong nagmaneho sa iyang motorsiklo ang biktima dihang gisundan kini sa laing motorsiklo nga giluwanan sa duha ka wala mailhing mga lalaki.
Gitaparan ang biktima sa gisakyan sa duha ka tawo dihang nahidangat sa atbang sa Canduman Elementary School ug gipusil ang biktima sa backrider.
Naigo sa iyang baba ug buko-buko ang biktima hinungdan nga misaliring sa daplin sa karsada hangtud nga kini nalamba.
Si Montecillo miingon nga nagtuo ang mga mamumuno nga patay na ang biktima mao nga mipabulhot sila sa pagpadagan sa ilang motorsiklo pahilayo sa dapit.
Daling gitabang ang biktima ug gidala sa tambalanan. Kasamtangan anaa kini karon sa Vicente Sotto Memorial Medical Center ug padayong gibantayan sa mga doktor ang kahimtang niini.
Blangko pa ang kapolisan sa motibo sa pagpusil sa biktima ug padayon ang ilang gihimo nga imbestigasyon ug wala nila gisalikway ang posibilidad nga personal nga panagbangi ang hinungdan sa krimen. (Rowena D. Capistrano/DILT)(BANAT NEWS)
- Latest
