Patay sulod sa awto

CEBU, Philippines – Patay ang usa ka 40 anyos nga lalaki kinsa adunay samad pinusilan sa iyang ulo sulod sa sakyanan niini sa may Marcelo B. Fernan Bridge kagahapon sa kaadlawon.

Ang patay giila nga si Ronald Tagcos, residente sa Barangay Basak, Dakbayan sa Mandaue.

Ang direktor sa Mandaue City Police Office nga si Police Colonel Julian Entoma nagkanayon nga nakadawat og tawag ang ilang buhatan nga adunay nagbabag nga Toyota Wigo nga sakyanan sa taytayan.

Sa dihang girespondehan, napalgan sa sulod sa maong sakyanan nga wala nay kinabuhi si Tagcos ug adunay samad pinusilan sa iyang ulo.

Matud ni Entoma nga anaa sa kamot niini ang usa ka kalibre .9mm nga armas hinungdan nga nakapangagpas ang kapolisan nga kini naghikog.

Nunot kay sa habig sa Dakbayan sa Lapu-Lapu ang insidente, hurisdiksyon na sa Lapu-Lapu City Police Office ang pag-imbestigar sa kaso. Butyag sa direktor sa LLCPO nga si Police Colonel Limuel Obon nga daku ang ilang pagduda nga naghikog kini sanglit nakakaplag ang taga Scene Of the Crime Operatives (SOCO) og usa ka gikatahong suicide note.

Wala na hinoon niini gibutyag kun unsa ang nakasuwat niini.

Apan sigun ni Police Staff Sergeant Earl Gemota sa Pusok Police Station sa LLCPO nga base sa gibilin nga suicide note, si Tagcos aduna kini depresyon sa emosyon mahitungod sa pamilya.

Wala hinoon gisalikway sa mga imbestigador nga adunay foul play ang nahitabo.

Matud ni Obon nga kasamtangan pa nilang subayon ang mga kuha sa closed circuit television (CCTV) camera sa dapit.

Ang insidente nakamugna og grabeng huot sa mga sakyanan sayo sa kaadlawon hangtud na hapit alas 8 kagahapon sa buntag dihang nakuha ang sakyanan nga nabangga sa center isle sa taytayan. (Jezebel G. Braulio /GMR)(BANAT NEWS)