Paglaum tun-an una ni Garcia; Gullas mohatag og scholarship

CEBU, Philippines – Dili pa sigurado karon ang sitwasyon sa Paglaum Scholarship Program sa kanhi administrasyon ni gobernador ug karon Bise Gobernador Hilario Davide, III.

Matud ni Gobernador Gwendolyn Garcia nga iyaha unang tun-an ang maong programa hilabina nga dili pa siya suhito niini.

Ang Paglaum Scholarship Program namugna kini ubos sa administrasyon ni Davide pinaagi sa Provincial Council for the Welfare of Children (PCWC).

Ang mga kwalipikado nga mahimong scholars mao kadtong mga anak sa kabus ug mga biktima sa pang-abuso nga dili maka-afford og eskwela sa kolehiyo.

Ang mga scholar ubos sa maong programa adto mo eskwela sa mga state colleges ug universities diin sila kinahanglang mag-maintain og grado.

Sa laing bahin, gawas nga libre na ang pagtungha sa Talisay City College (TCC) mohatag usab og libre nga scholarship program si Mayor Gerald Anthony “Samsam” Gullas sa Dakbayan sa Talisay.

Kini maoy usa sa iyang mga programa nga gustong mapatuman ubos sa iyang administrasyon.

“Katong mga bata like mo-excel o maayo sa math pangutan-on siya kong ganahan ba siya mokuha sa kurso nga engineering or unsa nga kurso related sa iyang forte”, padayag ni Gullas.

Matud ni Gullas nga ang mga tinun-an nga mapilian adto paeskwelahon sa nag-unang mga tunghaan sa Siyudad sa Sugbo nga maghatag og specialty sa nagkalain-laing  kurso. Ang maong programa ni Gullas iyang gipanganlan og “Cream of the Crop Scholarship”.

Ang Department of Education (DepEd)   maoy motutok niining iyang programa sa pagpili sa mga kabataan nga angayang hatagan sa scholarship. (Gabriel C. Bonjoc/BDB)(BANAT NEWS)