Bagong hepe sa Talisay naeskapoha’g binilanggo
CEBU, Philippines – Gisugat og pag-eskapo ang bag-ong hepe sa kapulisan sa Syudad sa Talisay kagahapon sa buntag.
Si Police Major Orlando Carag Jr. mo-courtesy call unta ni Mayor Gerald Anthony “Samsam” Gullas apan nakaapil na hinuon kini sa paggukod sa piniriso nga nieskapo.
Hinuon si Ramises Torrejos, 33 nga taga Barangay Cansojong sa maong siyudad dali rasab nga nasikop. Igo ra siya nakapalayo og usa ka kilometro gikan sa bilanggoan dihang naabtan sa mga polis.
Si SPO4 Tim Soreño niingon nga na-busy ang jailer nga si PO1 Romeo Saberon hinungdan nga nakahigayon og sibat si Torrejos. Ang prisuhan nahimutang sa ubos nga bahin sa Talisay City Hall.
Nitug-an si Torrejos nga samtang natulog ang ubang piniriso iyang gikalingawan og kulkog ang kandado sa alambre nga iyang nakit-an ug dihang naabli nidagan dayon siya pagawas nga hubo ang sinina.
Ang bag-ong hepe nga nakadungog sa report nga adunay nakaikyas niapil nalang sab kini og gukod inay nga modiretso og pakigkita kang Gullas sa city hall.
Ang binilanggo nga si Torrejos nitug-an nga naguol siya sa iyang pagkadakop ingon man dili siya malakip sa plea bargaining agreement ug gimingaw sab siya sa iyang hinigugma.
Ang direktor sa Cebu Provincial Police Office nga si Police Colonel Roderick Mariano midepensa ni Carag apan buot niyang kasohan og negligence of duty ang jailer. Si Carag mao ang nipuli ni Police Lieutenant Colonel Marlu Conag kinsa mao na karon ang hepe sa Provincial Intelligence Branch sa CPPO. (Camille Pateres/IBM)(BANAT NEWS)
- Latest
