Mag-reblocking sa nasunogan sa Tipolo

CEBU, Philippines — Magpaabot pa og  gamay  nga panahon ang mga biktima sa sunog sa Espina Compound,  Basubas ug Sitio Maharlika  sa Barangay Tipolo  sa Dakbayan sa Mandaue ayha pa sila makatukod pagbalik sa ilang mga balay diha sa maong dapit.

Si Mayor Jonas Cortes buot nga paabunohan una ang mga lupa nga bahin sa lugar ug pagpatuman og reblocking tungod sa nasinating kalisdanan sa kabomberohan pagresponde tungod sa kahuot sa dalan.

Dili buot ni Cortes nga i-relocate ang mga nasunogan kondili ang paghapsay sa pagkahimutang sa mga balay ug estraktura. Ang maong lugar makatulo na nasunog sa nanglabay nga katuigan.

Gawas pa niini, pirme sab bahaon ang mga ubos nga bahin niini mao nga gusto sa mayor nga abunohan kini og yuta.

Moabot dul-an 500 ka pamilya ang nabiktima sa maong sunog ug gisaad niya nga wala nilay mawad-an og kapuy-an bisan kadtong dili na pabalikon sa mga pribadong tagiya sa luna tungod kay mangita og relocation site ang siyudad para kanila.

Niadtong adlaw nga Biyernes, giduaw ni Senador Christopher Lawrence ‘Bong’ Go ang mga nasunogan ug gihatdan sila og hinabang. Ang senador gikan pa usab sa Bislig City, Surigao del Sur diin nanghatag sab og hinabang sa 344 ka pamilyang nasunogan didto.

Nanghatag si Go og pinansyal nga tabang ug mga grocery packs.

“Galing ito sa mga kaibigan natin, mayroong financial assistance at grocery packs kada pamilya. Iba rin ang tulong galing NHA, PCSO,DSWD at PAGCOR. Nandito rin ang DTI para magbigay ng livelihood.

Ako na rin ang bibili ng damit ng mga estudyante pati na rin inyung school supplies,” siya miingon.

Dugang pa niya nga...” Kaya po ako nandito ngayon. Ipinangako yan sa mga Pilipino na kung saan man kayo pupuntahan ko kayo. Ang gusto ko aksyon kaagad at ora mismo, uunahin ko kayo,” matud niya importante alang sa gobierno ang dinaliang pagtubag sa mga panginahanglan mga naapektohan sa mga katalagman.

Si Go mipasalig sab nga matabangan ang mga biktima sa National House Authority aron sila makabaton og desenteng kapuy-an.

Matud niya kinahanglan nga magtukod ang gobiyerno og mga luwas nga permanenteng evacuation centers sa tibuok nasud kay sa pagkakaron adto ra sila kasagaran ipahiluna sa mga barangay centers, plaza, gymnasium, basketball courts, ug uban pa.

“Kailangan mag-patayo tayo ng mga safe, permanent and dedicated evacuation centers na merong sapat na mga emergency packs, katulad ng blankets, tubig, gamot, flashlight at ready na relief goods” matud niya.

Nagpasalamat sab si Go sa Cebu tungod sa dakong suportang gihatag kaniya sa nakalabay nga eleksyon. Si Go ikatulo sa tanang nakadaog pagka-senador. (Rose Carmel De la Cerna /IBM)(BANATNEWS)