Dagan sa trapiko sa south giobserbahan
CEBU, Philippines — Si Konsehal Dave Tumulak, chairman sa committee on public order and safety nisugyot nga bahinon ang mga bus ug mini bus.
Kini kalabutan sa tinguha sa presidente sa Cebu Mini Bus Operators Julieto Flores nga paagion sila diha sa south district sa Cebu City.
Kagahapon gipahigayon ang dry run diin gi-monitor kini nila ni Tumulak, Flores ug operation’s chief sa Cebu City Transportation Office (CCTO) Francisco Ouano.
Nagkanayon si Tumulak nga adunay mga drayber nga dili ganahan moagi sa N. Bacalso Avenue habig sa Cebu City tungod kay sa Siyudad sa Talisay pa lang giingong traffic na ug maglisod sila og lusot hinungdan nga moliko sila diha sa Cebu South Coastal Road(CSCR).
Gisugyot ni Tumulak sa mga bus operator nga magpahigayon og diyalogo nga tambongan sa mga representante sa eskwelahan, barangay, negosyante ug mga pasahero aron usab madungog ang ilang tingog ug makagama og solusyon sa pagmenus sa trapiko sa south district sa maong siyudad.
Si Ouano sa iyang bahin, nagkanayon nga experimental pa ang gihimong dry run diin molanat kini og upat ka adlaw ug sugdan gikan sa alas 9:00 sa buntag hangtud sa alas 3:00 sa hapon.
Dili pa makahatag og assessment ang CCTO karon sa dry run tungod kay wala pa mahuman.
Samtang si Flores nagkanayon nga kon magmalampuson ang dry run nga gihimo ug makita nga maayo ang dagan sa trapiko mohangyo sila sa bag-ong administrasyon nga paagion sila sa south district. (/BDB)(BANATNEWS)
- Latest
