Magsuong HVT subling nasikop

CEBU, Philippines – Managlahing drug operations gipahigayon sa nagkadaiyang units sa kapolisan sa Metro Cebu niadtong miaging adlaw.

Mobalor og P374 mil nga gituohang shabu ang nasakmit gikan sa duha ka suspek atol sa gipahigayong buy-bust operation sa Brgy. Suba ug Brgy. Lahug, Dakbayan sa Sugbo niadtong Miyerkules.

Ang mga dinakpan mao sila si Matt Goeman Ocampo, 19-anyos, residente sa Sitio Lower Peace Valley, Brgy. Lahug ug si Kagani Minguito, taga Block 3 Missionaries, Brgy. Suba.

Ang City Drug Enforcement Unit ug mga sakop sa Cebu City Police Office nga gipangulohan ni PLtCol. Carlito Apilat miingon nga nakadawat sila og kasayuran labot sa ilegal nga kalihukan sa duha hinungdan nga gihimo nila ang beripikasyon dayon ang buy-bust operation. Nasakmitan si Ocampo og 10 ka pakete sa gituohang shabu samtang pito ka dagkung pakete sa gidudahang shabu nga mitimbang og 35 gramos ug mibalor og P238 mil.

Nasikop sab sa mga sakop sa Mandaue City Police Office ang managsuong high value target sa Sitio Nawanao Block 2, Brgy. Subangdaku kagahapon sa buntag. Ang mga nadakpan mao sila si Radney Ricaplaza ug Yolanda Ricaplaza.

Matud ni MCPO director Police Colonel Julian Entoma nga pipila ka bulan nilang gimonitor ang duha human nagpadayon gihapon sa ilang ilegal nga negosyo.

Gitug-an ni Entoma nga si Radney naka-avail sa plea bargaining agreement human sa pito ka tuig nga pagkapriso, samtang si Yolanda anaa kini sa probationary. Gibutyag sa director nga ubay-ubay sa ilang mga nadakpan, mitug-an nga ang managsuon maoy tinubdan sa ginadili nga drugas.

Ang gituohang shabu nga motimbang og 114 gramos, gibanabanang nagkantidad og P776 mil.

Ang mga dinakpan pulos hugot nga mihimakak nga ilaha ang maong nakuha nga ebidensiya

Sa Dakbayan sa Lapu-Lapu, unom ka gituohang pusher ang nasikop diin miabot sa P65 mil nga kantidad sa gituohang shabu ang nakuha.

Si PLt. Jose Leo dela Fuentes miila sa ilang nadakpan sa Sitio Ibabao, Brgy. Pusok nga si Junrey Benigno ug Ricky Dela Peña. Nakuhaan sila og 14 ka gagmay’ng pakete,

Nadakpan sa Sitio Saac 1, Brgy. Buaya si Roberto Magkilat nga nakuhaan og 11 ka gagmayng pakete sa gituohang shabu. Nadakpan usab sa maong lugar si Rodrigo Casio, sakop sa City Traffic Management System uban si Meda Casinillo. Dose ka gagmayng pakete ang nakuha gikan kanila.

Nadakpan usab nila ni PLtCol. Mark Gifter Sucalit si Joup Ortega, taga Sitio Ka Isko, Brgy. Mactan ug nakuhaan og duha ka medium size nga pakete.

Samtang sa Lungsod sa Consolacion, nasikop sila si Herculano Altrecha ug Walter Niepes pulos taga Brgy. Lorega sa Dakbayan sa Sugbo.

Nasakmit gikan kanila ang 52 gramos sa gituohang shabu nga mobalor og P354.  Sumala ni Police Corporal Niño Barabad, aduna silay mga dinakpan nga mitug-an sa pangalan sa duha hinungdan nga ila kining gipanid-an ug miresulta sa operasyon. Ang mga dinakpan nagtingkagol na karon sa lock-up jail samtang giandam ang pagsang-at og tukmang kaso batok kanila. (Rowena D. Capistrano ug Jezebel G. Braulio /DILT)(BANAT NEWS)