Mariano: Kampaniya batok ilegal nga drugas pahugtan pa
CEBU, Philippines – Ang bag-ong direktor sa Cebu Provincial Police Office (CPPO) Police Colonel Roderick Mariano mopatuman og beat patrol system sa Probinsiya sa Sugbo ilabi na sa mga dagkong siyudad.
Apan giklaro niini nga ilaha pa kining tun-an ilabi na nga kuwang ang pwersa sa polis sa probinsiya diin kasagaran dagkong lugar ang sakop niini.
Kagahapon nagpahigayon og unang command conference si Mariano diin usa sa mga gihisgutan mao ang kampaniya batok sa ilegal nga drugas diin buot niya nga pahugtan pa kini.
Si Mariano magpaubos og briefing sa mga narelibohang miyembro sa Provincial Intelligence Branch (PIB) kabahin sa mga watchlist sa ginadiling drugas sa probinsiya ilabi na kadtong mga dagkong personalidad diin usa niini si retired general ug outgoing mayor sa Lungsod sa Daanbantayan Vicente Loot.
Giingong dili usab pasagdan ni Mariano ang mga nabiyaang unclosed sensationalized cases sa iyang gihulipan nga si Police Colonel Manuel Javier Abrugena.
Kabahin sa problema sa “squatter police stations” sa probinsiya, matud ni Mariano nga iya kining ipaabot ngadto sa bag-ong gobernador nga si Gwendolyn Garcia diin karong Lunes gikatakdang mag-courtesy call siya niini.
Nasayran nga gitinguha karon sa direktor sa Police Regional Office-7 Police Brigadier General Debold Sinas nga makaangkon og kaugalingong luna ang kapolisan pinaagi sa pagdonar og luna sa lokal nga kagamhanan ngadto sa kapolisan.
Sayo pa, gipadayag sa tigpamaba sa PRO-7 Police Lieutenant Colonel Maria Aurora Rayos nga base sa ilang datos 32 porsyento o 16 sa 49 ka estasyonan sa polis ang mga gikonsiderar nga squatter sanglit gipanag-iya gihapon sa lokal nga kagamhanan ang luna nga gitukoran niini. Ang estasyonan sa mga component city sa Probinsiya sa Sugbo sama sa Dakbayan sa Danao, Naga ug Carcar mga squatter gihapon. (/BDB)(BANAT NEWS)
- Latest