22-anyos nga HVT nakuhaag colored shabu

CEBU, Philippines — Nadakpan sa kapolisan ang 22 anyos nga giingong high value target sa kampanya batok illegal nga drugas atol sa gihimong buy bust operation diha sa Sitio Caduloy, Barangay Tisa, Dakbayan sa Sugbo kagahapon sa buntag.

Ang dinakpan giila nga si Mike Vincent Ranolo Oliamot, residente sa Sitio Ponce 1, Barangay Carreta, Dakbayan sa Sugbo.

Sa report sa kapolisan, positibong napalitan sa poseur buyer si Oliamot og usa ka medium nga paketeng gituohang shabu.

Nakuha gikan sa posesyon niini ang usa ka green nga paper bag diin adunay sulod nga laing usa ka medium nga pakete sa gidudahan sab nga shabu ug laing 20 ka buok medium nga pakete nga may suold nga light brown nga gituohang shabu.

Kun timbangon, giingon aduna kini gibug-atong 110 ka gramo ug mobalor na og P748 mil base sa Dangerous Drug Board Value.

Ang bag-ong hepe sa Labangon police station nga si Police Major Henrix Bancoleta mibutyag sa Banat News nga sa usa ka semana nilang gi-surveillance si Oliamot.

Matud niini duha ka klaseng drogas ang baligya ni Oliamot, ang puti ug light brown nga klase sa shabu. “I-check pa na sa crime lab, depende sa grade sa shabu pero usually pag brown is low grade pero di ko ma-confirm pa as of now,” sigun sa maong hepe.

Kahinumdoman nga sa miaging buwan usa ka HVT sab sa Sitio Lahing-Lahing Barangay Mabolo sa Dakbayan sa Sugbo ang nasakmitan sab og brown colored nga shabu.

Gikonsiderar nga High Value Target si Oliamot sanglit matud pa sa maong hepe nga dili momenos sa 400 ka gramong drogas ang mabaligya sa maong suspetsado.

“The information (about him) came from previous arrested drug personalities and with the help of informants,” sigun pa ni Bancoleta.

Matud niya sakop sa usa ka dakong drug group si Oliamot ug ang mga amo sa grupo niini anaa natanggong sa Cebu City Jail karon apan padayon gihapon sa ilang operasyon pinaagi sa mga kaparehas ni Oliamot.  Si Oliamot magatubang og kasong paghupot ug pagpamaligya og illegal nga drogas. (Jezebel Braulio/IBM)(BANATNEWS)